Geplangte Steewollfabrick "Mir hu gekuckt, datt mer Knauf heimat konnte verhënneren. Jo."

Den Terrain, ëm deen et geet, ass elo eng Zone de servitude urbanisation industrie innovatrice. Konkret heescht dat, datt wien och ëmmer dohinner kënnt (oder komme wëllt), gewëss Garantië muss ginn, wat d'Liewens- an d'Loftqualitéit oder och den Naturschutz ubelaangt.

"Alleguer déi Entreprisë ronderëm musse sech där Reglementatioun ënnerwerfen", erkläert de Suessemer LSAP-Buergermeeschter Georges Engel.

Net nëmmen eng Entreprise eleng, mee de Cumul vun den Entreprisen, misst gekuckt ginn. "Ech mengen, datt dat en neit Element an dësem Dossier ass, an datt dat et effektiv méi schwéier mécht, datt Knauf elo kann dohinner kommen", seet de Georges Engel.

Entscheedung wuel fréistens an engem Joer

Ob déi Servitude juristesch d'Strooss hält, ob se nach am definitive PAG wäert stoen, deen dem Inneminister wuel fréistens an engem Joer no engem zweete Vott am Gemengerot zur Approbatioun virgeluecht gëtt, muss sech weisen. Mee bis dohi leeft d'Zäit, an et ka kee Projet realiséiert ginn, deen net konform mat deenen zwee PAGen ass; weder een, deen haut en Vigueur ass, nach een, deen elo an d'Prozedur geet. "Dat spillt eis an d'Kaarten", gëtt de Georges Engel gär zou.

Et wier een net generell géint Industrie op deem bestëmmten Terrain. Wann den Impakt, deen déi Industrie hätt, d'Liewens- an d'Loftqualitéit net grave géif verschlëmmeren, da wier een och domat averstanen, fir op dësem bestëmmten Terrain weider Industrie unezesiddelen. "Mee eben net d'Firma Knauf, sou wéi se elo geplangt ass."

Zil: Firma Knauf verhënneren

D'Demarche, déi elo gewielt gouf, wier déi logesch Suite vun engem Vott, deen de Suessemer Gemengerot virun e puer Méint geholl hätt, an deem e sech formell géint de Projet Steewollfabrick opposéiert hat.

Et géif ee probéiere konsequent ze sinn. D'Demarche, déi gewielt gouf, géif effektiv dorop ofzilen d'Firma Knauf zu Suessem ze verhënneren. De Prinzip vun der kommunaler Autonomie, géif et der Suessemer Gemeng erlaben, eng Servitude op e Staatsterrain ze leeën, erkläert de Georges Engel. An déi kéint fréistens ausser Kraaft gesat ginn, wann déi nei sektoriell Pläng bis do sinn.

Bäitrag vum Maurice Molitor am Panorama vun 12 Auer:

Lauschteren

Iddi vun déi Gréng lancéiert

Déi Gréng vu Suessem haten d'Iddi lancéiert, fir am Kader vum PAG eng " zone de servitude - urbanisation "qualité de l'air" " op d'national Aktivitéitszone " Parc Industriel Pafewee Ilôt Est / Gadderscheier " dropzeleeën, fir op deem Wee ze verhënneren, datt Betriber sech an där Zon néierloossen, déi der Loft- a Liewensqualitéit an der Gesondheet schueden. Eng deementspriechend Ufro hätten si den 28. Mäerz un de Suessemer Schäfferot gemaach.

Dat war d'Reaktioun vun deene Grénge vu Suessem, nodeems mir de Mëtteg gemellt haten, datt d'Gemeng Suessem de leschte Freideg eng Décisioun geholl huet, déi eng Implantatioun vun der Steewollfabrik an der Industriezon Gadderscheier méi schwiereg a vläicht souguer onméiglech mécht.

Elo zesumme mat Wirtschaftsministère no Léisung sichen

Déi gréng Suessem begréissen an hirer Reaktioun, datt hir Iddi beim Schäfferot Uklang fonnt hätt. Si betounen awer, datt si net generell géint nei Industriebetriber an hirer Gemeng wieren, mee just Betriber, déi nohalteg, ëmweltfrëndlech an innovativ produzéieren. Dofir hätte si och dem Schäfferot proposéiert, fir mam Wirtschaftsminister an den Dialog ze trieden, fir zesumme mat him an den Acteuren aus Industrie a Fuerschung no Léisungen a no Alternativen ze sichen.