ProVelo "Mir fuerderen de "réflexe vélo" bei jidderengem"
Um Samschdeg Mëtteg hunn an der Stad Cycliste fir ee méi séchere Vëlosreseau iwwerall am Land manifestéiert. Der Police no ware 500-600 Vëloe bei der Maniff dobäi. Nodeems et Ugangs der Woch Tensiounen tëscht den Organisateuren an dem Stater Schäfferot gouf ronderëm d'Ofhale vun der Maniff an hiren Tracé, sinn d'Manifestanten de Mëtteg elo op deem Wee um Wee gefuer, dee vun der Police encadréiert gouf.
Op der Streck sinn op Plazen, déi den Organisateuren no besonnesch geféierlech fir d'Vëlosfuerer sinn, Schëlter mat Fuerderungen opgehaange ginn. D'Monique Goldschmit, Presidentin vun der Associatioun "ProVelo", wënscht sech ee ee méi héije Stellewäert a méi Opmierksamkeet fir de Vëlo am ëffentleche Raum:
"Et geet ëm eng nei Opdeelung vum Raum, et geet drëms, datt de Vëlosfuerer seng Plaz fënnt. Et kann net sinn datt eng Stad wou 50 Joer alles fir de motoriséierte Verkéier gemaach gouf, nach ëmmer déi selwecht Politik gemaach gëtt. Dofir gëtt et hei an der Stad, zu Esch, zu Dikrech, zu Ettelbréck, zu Wolz, egal, iwwerall och an eise klenge Gemengen, héich Zäit datt de Vëlo eescht geholl gëtt. Fir datt mir ëmmer an iwwerall sécher mam Vëlo kënnen hifueren. Mir fuerderen de "réflexe vélo" bei jidderengem, an net nëmmen datt ëmmer erëm de Sécherheetsproblem op de Vëlosfuerer ofgedréckt gëtt."
Den Tracé goung vun der Cité judiciaire iwwer de Boulevard de la Pétrusse op d'avenue Marie Thérèse an dann op de Lampertsbierg an zeréck bei de Pescatore. Leit, déi matgefuer sinn, hunn hir Motivatioun op ënnerschiddlech Aart a Weis ausgedréckt. "De Vëlo ass mäin Auto ginn", awer och vill Kritik iwwer déi existéierend Infrastruktur zu Lëtzebuerg.
Lauschtert d'Reaktioune vun de Cyclisten
Organiséiert gouf d'Maniff ënner anerem vun enger Rei Vëlosassociatiounen, der Sécurité routière an der europäescher Federatioun vun den Affer aus dem Stroosseverkéier.
Méi zum Thema
ProVelo begréisst Alenke vun der Stad Lëtzebuerg
D'ASBL ProVelo begréisst, datt d'Stad Lëtzebuerg eng Vëlosmanifestatioun e Samschdeg awer autoriséiert. D'Stad hätt awer nëmmen noginn, well ProVelo eng Plainte beim Verwaltungsgeriicht wollt areechen, sou d'Presidentin vu ProVelo.
ProVelo-Demo an der Stad gëtt eventuell awer erlaabt
D'Diskussiounen ëm e Verbuet vun der ProVelo Demonstratioun nächste Samschden an der Stad sinn nach net ofgeschloss. De Mëtteg soll am Stater Schäfferot nach eemol doriwwer berode ginn.
Manktem un Dialog: "ProVelo" kritiséiert d'Stad Lëtzebuerg
D'ASBL "ProVelo" kritiséiert, datt den Dialog mat der Stad Lëtzebuerg fir Vëlosinfrastrukturen net zefriddestellend wier. D'Stad stoung ënner der Woch och wéinst enger Etüd iwwer Foussgängersécherheet an der Kritik.
