Ersatzgehalt fir Independanten Patronat: "Mir finanzéieren eis net zwee mol"
D'Patronat reagéiert verwonnert op d'Annonce vum Dan Kersch iwwer d'Ersatzgehalt fir Independanten. Dat soll vu Mäerz un iwwer eng Mutualitéit, an net iwwer de Chômage partiel finanzéiert ginn.
D'Patronat ass eegenen Aussoen no erstaunt datt den Aarbechtsminister ouni hiren Accord a kuerz virun enger gemeinsamer Reunioun sou eng Mesure op RTL annoncéiert.
Fir d'Patronat wier et kloer, datt d'Ersatzgehalt soll vum Fonds pour l'emploi finanzéiert ginn an net vun enger neier Mutualitéit an där d'Käschten tëschent dem Staat an de Betriber opgedeelt ginn, esou de Michel Reckinger, President vun der UEL. Souwuel den Independant wéi de Salarié géifen an de Fonds de l'emploi abezuelen. Et wier also gerecht, Entschiedegunge fir déi zwee aus dësem Fonds ze bezéien.
D'Alexa Ballmann, Presidentin vun der Associatioun "Jonkt Handwierk" weist sech erstaunt iwwer des Mesure an der Press ze liesen. D'Patronat hat fir den 23. Februar eng Reunioun mam Dan Kersch a mam Mëttelstandsminister Lex Delles geplangt, wou et eigentlech ëm d'Modalitéite vum Ersatzgeld sollt goen.
D'Politik géif sech schwéier mam Sujet doen, seet och de Generaldirekter vun der Chambre des Métiers, Tom Wirion. Hie fuerdert eng dauerhaft Léisung, déi ee kann a Krisenzäiten asetzen.
De Michel Reckinger werft dem Dan Kersch fir, vum eigentlechen Theema, der Gerechtegkeet vum Independant virum Fonds de l'emploi, ofzelenken. Den Aarbechtsminister wéilt elo eppes iwwer de Knéi brieche fir kënnen ze soen, en hätt eppes gemaach.
Méi zum Thema
Patronat: CGFP ass "e Problem"
De President vun der UEL zitt Bilan op sengem leschten Dag: den Decalage tëschent der Politik an der Wirtschaft gëtt ee Problem. Och bei der Fonction publique géif ee sech selwer ëm kompetent Beamte bréngen.
Patronat: "D'Finanzhëllefe vun der Regierung ginn net duer"
De President vun der Union des Entreprises fuerdert weider net remboursabel Direkthëllefe fir d'Betriber. Besonnesch d'Handwierk, de Commerce, d'Restauratioun an den Tourismussecteur bräichten elo nei Hëllefen, esou den Nicolas Buck.
