Impfungen Méiglech Impfung eréischt 2021
D'Impfunge géint de Coronavirus kéinten eventuell eréischt am éischten Trimester 2021 hei am Land ukommen. Dat schreift d'Gesondheetsministerin haut an hirer Äntwert op eng parlamentaresch Fro vun der CSV-Fraktioun.
D'Ministerin baséiert sech dobäi op aktuell Aussoe vun der EU-Kommissioun. Déi Lëtzebuerger Regierung géif keng Eegeninitiativ plangen iwwer d'Verhandlunge vun der EU-Kommissioun eraus Impfstoff ze kafen.
Bei der Decisioun, wéi eng Leit hei am Land prioritär solle geimpft ginn, soll der Entwécklung vun der Epidemie Rechnung gedroe ginn. International Recommandatiounen, wéi z.B. vun der Weltgesondheetsorganisatioun, sollen awer och mat afléissen.
Der WHO no gëlle vulnerabel Persounen a Leit aus de Gesondheets- a Fleegeberuffer als prioritär, esou d'Gesondheetsministerin.
Méi zum Thema
Wie soll fir d'éischt geimpft ginn?
An Däitschland gëtt déi national Impfstrategie ëmmer méi konkret. Gëschter gouf e Konzept presentéiert, wei eng Beruffs- an Populatiounsgruppe bei den Impfunge solle prioriséiert ginn.
Wéini kënnt den Impfstoff?
AstraZeneka huet d'Tester vu sengem Corona-Impfstoff gestoppt. D'Prozedur soll awer net an d'Längt gezu ginn. Et ass net sécher, ob den Impfstoff dëst Joer nach zu Lëtzebuerg disponibel ass, esou d'Santé.
