Ainhoa Achutegui Méi ongewollte Schwangerschafte wéinst Confinement?
D'Demande no enger Ofdreiwung kéint elo an d'Luucht goen, seet d'Presidentin vum Planning familial, d'Ainhoa Achutegui. Well den Alldag op d'Kopp geheit gouf, vergiessen d'Frae gären d'Pëll reegelméisseg ze huelen a riskéieren ongewollt schwanger ze ginn. De Planning familial ass trotz sanitärer Kris disponibel, mee huet eng Rei Schutzmoossnamen ergraff fir déi sozial Distanzéierung ze respektéieren.
De ganzen Interview lauschteren
All Persoun, déi eng Consultatioun oder Berodung vum Planning familial brauch, soll fir d'éischt uruffen oder iwwer Email a Messenger schreiwen. Da kann an enger éischter Phas gekuckt ginn, wéi een der Patientin kann hëllefen.
Duerch d'Corona-Kris ass den Zougang zu Verhütungsmëttele wéi d'Pëll hei am Land e bëssen ageschränkt. D'Fraendokteschen an -Dokteren, oder d'Psychologen am Planning, kënnen eng Consultatioun per Telefon assuréieren. Fir d'Erneierung vun enger Verschreiwung brauch d'Patientin net bis bei de Planning ze goen. D'Ordonnancë ginn iwwer d'Post verschéckt.
Demande no enger Ofdreiwung kéint an d'Luucht goen
Wann den Alldag sech ännert, da vergiessen d'Fraen gären hir Pëll reegelméisseg ze huelen, esou d'Ainho Achutegui.
"Mir hunn och eng ganz grouss Facebook Campagne lancéiert, fir datt d'Leit hir Verhütung net vergiessen. Am Moment ginn et net méi Ofdreiwunge wéi soss. De Planning erwaart awer vun der nächster Woch u méi Demandë fir een Avortement. De Confinement dauert elo zanter véier Wochen. Frae mierken den Ausfall vun der Period eréischt véier bis fënnef Wochen no der leschter Reegel."
Aus deem Grond geet de Planning dovunner aus, datt et elo zu méi Fäll vun ongewollte Schwangerschaften kënnt.
Fraendokter ass och wärend der sanitärer Kris disponibel
Geet et ëm eng Ofdreiwung, da muss déi Fra natierlech bei de Planning laanscht goen.
Wichteg ass och ze wëssen, datt een no engem ongeschützten Akt bannent 24 Stonnen a maximal bis zu dräi Deeg d'Pilule du lendemain muss anhuele fir eng Schwangerschaft ze verhënneren. Do soll d'Persoun beim Planning familial uruffen oder laanscht goen a schellen. D'Patientin gëtt do vun enger Doktesch empfaangen, déi dann d'Pilule du lendemain direkt kann iwwerreechen.
Fir sech diskret un de Planning familial ze adresséiere, wann ee mierkt, datt een ongewollt schwanger ass, kann een nieft dem Telefon och iwwer Email Kontakt ophuelen. Vill Jonker géife Facebook a Messenger notzen, seet d'Presidentin vum Planning familial. Och do kritt ee séier eng Äntwert. Et wier trotz sanitärer Kris méiglech eng diskret Consultatioun ze organiséieren, déi op Distanz mat de Psychologen ofgemaach gëtt.
Méi zum Thema
Konfliktvermeidung wärend dem Confinement
Wéi kann ee wärend der Quarantän bewosst preventiv handele fir Aggressiounen a Gewalt doheem ze vermeiden? Infomann réit Distanz ze schafen a Gefiller vun Angscht, Onsécherheet a Machtlosegkeet ze acceptéieren.
