Auslandschronik Méi Ëmwelt, manner Auto

Et kléngt wéi erfonnt: den däitsche Verkéiersminister wëll d'Grenzwäerter fir d'Ëmweltbelaaschtung duerch Stéckoxiden néi definéieren. Déi wieren ze héich, seet den Andreas Scheuer an engem Interview mat der BILD-Zeitung. Hie berifft sech dobäi op e Communiqué vun 100 Longendokteren - vun deenen op mannst ee bis viru kuerzem vir den Autosproduzent Daimler geschafft huet.

Den Andreas Scheuer fënnt, Däitschland géif sech mat sou "masoschistesche Grenzwäerter" selwer schueden. Et ass genau ëmgedréint: Et ass de Verkéiersminister, deen dem Land am Moment schued.

Representant vun der Industrie

Den CSU-Politiker steet schonn zënter Méint hannert der grousser, mächteger Autosindustrie. Genau wéi d'Lobby vun der Industrie schwätzt hie sech géint Norëschtunge vun alen Dieselen aus. De Scheuer huet net déi däitsch Bierger am Sënn, mee d'Produzenten. A wann hie Sätz seet wéi "Et gi Leit an Däitschland, déi wëllen den Diesel an duerno de Bensinsauto zerstéieren", da kritt ee schonn d'Gefill, datt do een de Representant vun der Industrie, an net vun der Populatioun ass.

Den Andreas Scheuer ass awer net deen eenzegen, un deem een am Moment erkennt, datt et ëm d'Ëmweltbewosstsinn an Däitschland grad net ganz gutt steet.

An de leschte Wochen demonstréieren an Däitschland - wéi a ganz Europa - dausende Schüler a Studente fir e bessere Klimaschutz. Si demonstréiere géint déi aktuell Politik vu Leit wéi dem Andreas Scheuer, a fir eng Zukunft, déi si vill méi concernéiert wéi déi Leit, déi am Moment d'Decisiounen treffen.

Anti-Jonk, Anti-Zukunft

Ma wien an den däitsche sozialen Netzwierker d'Reaktiounen op dës Demonstratioune verfollegt huet, deem konnten nawell gär d'Aen aus dem Kapp falen. Virun allem eeler Politiker a Commentateuren hu sech do net iergendwéi mat den Demande vun der jonker Generatioun ausenee gesat. Au contraire: Ganz vill Leit hu sech iwwer déi Jonk lëschteg gemaach, zum Deel och beleidegt. Och mat der schwedescher Ëmweltaktivistin Greta Thunberg, där hir Protestaktiounen déi däitsch Demonstratiounen inspiréiert huet, gëtt op Twitter, Facebook a Co. immens vill de Geck gemaach.

Wat op deem Niveau grad an Däitschland geschitt, huet déi däitsch-tierkesch Schrëftstellerin Hatice Akyün vläicht am beschte beschriwwen.

Was müssen alte, weiße Männer schiss um ihre Existenz haben, dass sie sich jetzt sogar an einer 16-Jährigen abarbeiten müssen. #GretaThunberg #yougogirl

- Hatice Akyün (@HaticeAkyuen) January 27, 2019

Et ass genau déi Haltung, déi sech vun der Autosindustrie bis a grouss Deeler vun der Politik duerchzitt. Et ass Zäit, datt sech an Däitschland a Saachen Ëmweltbewosstsinn eppes ännert. Mee et stellt ee sech natierlech d'Fro, wéi dat soll goen, wa sech schonn de Verkéiersminister op Doktere verléisst, déi bis viru kuerzem nach sëlwer an der Autosbranche geschafft hunn.