Wunnengsmaart Ënnerschiddlech Meenungen iwwer d'Eegentumsrecht

Déi Lénk an d'LSAP si fir méi contraignant Bestëmmungen, wéi d'Besteierung vu fräiem Wunnraum an net genotzten Terrainen. Och d'Expropriatioun wier e Steier-Instrument am Logement, esou den LSAP-Generalsekretär Yves Cruchten an de lénke Spriecher Gary Diederich a Riicht eraus. D'DP an d'CSV sinn anerer Meenung: D'Demokratesch Partei wier net bereet, weider an d'Eegentumsrecht anzegräifen, esou den Deputéierte Max Hahn. Och den CSV-Deputéierte Felix Eischen huet sech géint eng Verschäerfung vun der Expropriatioun ausgeschwat.

Just 8% vun den 1.000 Hektar, déi an de Bauperimeter leien an direkt bebaut kéinte ginn, leien an ëffentlecher Hand, seet den Yves Cruchten. De Gros dovu wär an den Hänn vu Gesellschaften a Promoteuren, déi sech op Bauspekulatioun spezialiséiert hätten. Mat enger méi einfacher Expropriatioun wären déi Leit viséiert, an net kleng Famillen, déi Terraine fir hir Kanner halen.

Debatt am Hierscht

"Mir musse kee Konsens iwwert eng Mesure fannen, mä iwwert e Prinzip: mir kënnen et dem Marché net méi ganz eleng iwwerloossen”, esou de Gary Diederich.

D’Parteien hunn ofgemaach, fir am Hierscht parteiiwwergräifend an enger Debatt an der Chamber konkret Léisungsvirschléi auszeschaffen.

"Mir wäerten eis ganz Wunnkultur an den nächsten 20 Joer mussen änneren. Mir kréien all Joer bis zu 15.000 Leit bäi: Wou wunnen déi Leit?", freet de Félix Eischen (CSV). De Max Hahn (DP) mengt, datt en historesche Retard muss opgeschafft ginn, a gläichzäiteg nei Wunnenge fir nei Residente musse gebaut ginn. Eens ass ee sech, datt net eng Mesure eleng de Problem géing léisen.

Besëtzen oder lounen?

"Mir solle frou sinn, datt 70% vun de Residente Proprietairë sinn. Et soll eist Ziel sinn, de Leit d'Méiglechkeet ze ginn, Proprietaire vun hirer Wunneng ze ginn." Déi Meenung vum Yves Cruchten deelt de Gary Diederich net. Proprietaire si wär net den eenzege Liewensmodell. Grad déi Virstellung misst geännert ginn, andeems zu Lëtzebuerg eng Mietkultur geschaaft gëtt. Fir de lénke Politiker sollten och nei Wunnformen, wéi Wunnkooperativen, ausgebaut ginn.

De Max Hahn hieft d'Efforten ervir, déi d'Regierung am Beräich vum soziale Wunnraum gemaach hätt. Esou wär d'Kapital vun der SNHBM gehéicht ginn, an déi national Gesellschaft fir moderéierte Wunnraum hätt ënnert dëser Regierung méi nei Wunnengen op de Marché bruecht: vun 80 Wunnengen d'Joer op elo 250 d'Joer.

Eens si sech déi véier Politiker vun CSV, DP, LSAP an déi Lénk, datt massiv misst investéiert ginn, fir nei Locatiounswunnengen ze schafen. Dofir misst de Staat Bauland mobiliséieren.