Corona-Kris Manner Spenden: D'Caritas kéint Entwécklungsprojete stoppen

D'Caritas wier dofir um Punkt, wou verschidde Projeten eventuell misste gestoppt ginn, well et un den néidege Moyene feelt, esou d'Marie-Josée Jacobs. D'Kris géif een dozou zwéngen an der Entwécklungshëllef Choixen ze treffen "déi net liicht falen".

"Et musse méi Choixe gemaach ginn iwwer d'Zuel vun de Länner, an deenen der schafft. An eben iwwer d'Länner, déi betraff sinn, wou der da gesitt: dat do geet méi séier virun, oder do kanns de méi séier hëllefe mat deene Suen, déi s de zur Verfügung hues."

Wéi vill genee manner gespent gouf, kéint een zwar nach net soen, esou d'Marie-Josée Jacobs. Si betount awer den Ënnerscheed zu de Jore virdru wier "considerabel".

Eng schwiereg Situatioun an Entwécklungslänner

Datt verschidde Projeten eventuell misste gestoppt ginn, géif awer net nëmmen un engem Abroch bei de Spenden, mee och un engem Réckgang beim Budget leien: et wiere 60 Milliounen Euro am Ministère manner disponibel.

D'Situatioun an der Entwécklungshëllef wier deemno "duebel schwéier", esou d'Marie-Josée Jacobs, an dat géif d'ONGen zwénge méi Choixen ze maachen, déi net einfach wieren.

"Wann der e Projet an engem Land maacht, an dir fänkt un eng Schoul ze bauen, dann ass déi jo net an engem Dag fäerdeg, dat sinn dann awer Saachen, déi ee bis zwee Joer daueren. A wann der dann op eemol keng Sue méi hutt, da kennt der net méi virufueren. An dat ass fir déi Länner eppes, wat bal net ze verstoen ass."

D'Caritas-Presidentin hofft dofir, datt d'Lee bis zwee Joer méi lues virukommen. A si appelléiert un d'Donateuren d'Entwécklungslänner net ze vergiessen.