Äerdobservatiounssatellit Luxeosys: Oppositioun net averstane mat Erklärunge vun Défense

Datt de Projet also bewosst just d'Investitiounskäschten ofgedeckt hätt, an net déi laangfristeg Betribskäschten, huet den LSAP-Deputéierte Mars Di Bartolomeo no der Reunioun weiderginn. Deemno hätten d'Beamte gesot, datt si d'Bedreiwungskäschten net mat an den normale Budget gesat hätten, well déi an der Reegel zum Deel iwwer déi normal Budgete gelaf wieren. Dat wier zum Beispill bei den Dingoen a beim A400 esou gewiescht. "A si hätten näischt Aneschtes gemaach, wéi déi Doktrin, déi si virdrun haten", esou de Mars Di Bartolomeo.

De Parteifrënd vum fréiere Verteidegungsminister Etienne Schneider huet versicht, de Ball bei d'Deputéiert ze spillen, déi sech selwer misste mat der Nues huelen. De Staatsrot hätt deemools gesot, e géif eng kloer Oplëschtung vun de Käschten iwwer déi ganz Lafdauer vermëssen. "Ma dat ass a sech an der Chamber awer kaum thematiséiert ginn."

Tatsächlech haten d'Auteure vum Projet d'Confidentalitéit vun de Verhandlunge mam Konstrukteur invokéiert, fir der Chamber keng Fiche financière ze ginn.

Gast Gybérien: "D'Chamber ass belu ginn."

D'Deputéiert vun der Oppositioun hunn déi Erklärunge vun de Beamten awer net gëlle gelooss. Den David Wagner vun déi Lénk huet gemengt, wann ee fei wier, kéint ee soen, si géifen dovun ausgoen, datt all Deputéiert déi Prozedur fir Militär-Marchéë géife kennen.

"Dat heescht, et ass kloer, datt beim Vott 2018, gouf net gesot, datt nach weider Käschte kéimen, obwuel se de toute évidence woussten, datt nach weider Käschte kéimen. An da komme si elo a soen: Dir hätt et jo quasi misste wëssen. Ma nee, also et war net verbueden ze soen, datt weider Käschte kéimen."

Well am Exposé des motifs vum Projet an och am Rapport vum Gesetz drastoung, datt d'Fonctionnementskäschte gedeckt wieren, seet de Gast Gibéryen vun der ADR:

"Et ass fir mech ganz kloer no der Sitzung vun de Mëtteg, datt d'Chamber belu ginn ass. Mir hunn zu deem Zäitpunkt falsch Informatioune kritt, mir hunn net d'Wouerecht gesot kritt."

Dat well d'Beamten de Méindeg de Mëtteg och gefrot goufen, ob den Etienne Schneider wousst, datt et mat 170 Milliounen Euro net gedoen wier. "An och de Minister wosst et", esou de Gast Gybérien.

Och de François Bausch ass dovun ausgaangen, datt de Budget all d'Käschte géif ofdecken

D'Deputéiert waren och net déi eenzeg, déi der Meenung waren, de Budget vun 170 Milliounen Euro géif alles ofdecken. Wann een den aktuelle Verteidegungsminister François Bausch freet, wéi hien de Projet verstanen hat, wéi säi Virgänger Etienne Schneider e senge Kolleegen an der Regierung 2018 presentéiert hat, also mat oder ouni Betribskäschten, äntwert hien.

"Also ech muss iech soen, wann der och gesitt, wéi den Exposé des motifs motivéiert war, stoung kloer dran, datt et dra wier. Elo ass et natierlech esou, am Regierungsrot presentéiert all Minister säi Projet an da musse mir jo och dovun ausgoen, datt en d'Strooss hält par rapport zu deem, wéi mir e presentéiert kréien."

Widderspréchlech Aussoe vum Patrick Heck

De fréieren Direkter vun der Défense Patrick Heck hätt den Deputéierte gesot, et hätt kee politeschen Drock ginn, fir de Projet nach séier virun de Walen duerch d'Chamber ze bréngen.

Mee, esou d'Diane Adehm vun der CSV:

"Da kënnt de Beamten hannendrun, deen awer um Dossier geschafft huet. Da seet deen, hien hätt vu sengem fréieren Direkter dem Här Heck gesot kritt, aus politesche Grënn misst dat do nach onbedéngt virun de Walen 2018 duerchgoen. Da konfrontéiere mir den Här Heck mat senger eegener Ausso, wou hie seet: Ah nee, dat war net esou. Da seet den Här Heck: Jo nee, mee de Minister huet awer seng Leit zesummegeruff a gekuckt am Allgemengen am Kader vun der Defense, wat dann nach opportun wier, virun de Walen ze maachen a wat net. Dat heescht, et ass just drëms gaangen, fir dat doten nach virun de Walen duerch d'Chamber ze kréien. Net méi an net manner."

Der Presidentin vun der Budgetskontrollkommissioun no huet de Patrick Heck de Méindeg d'Conclusiounen am Rapport vu PWC a Fro gestallt a gesot, hie wier net vu PWC kontaktéiert ginn. PWC hat an deem Rapport fir de François Bausch schwéier Dysfonctionnementer an der Gestioun vum Projet festgestallt.

D'Budgetskontrollkommissioun huet Abléck a verschidden Dokumenter gefrot

D'Budgetskontrollkommissioun huet d'Defense gefrot, fir Abléck an eng ganz Rei Dokumenter ze kréien a wëllt mam Etienne Schneider en Datum fannen, fir datt hie kann Explikatioune ginn. Hien hätt der Chamber geschriwwen, hie géif kommen. Hien huet sech bis elo net vill zum Dossier Luxeosys geäussert, deen elo riskéiert, duebel esou deier ze gi wéi geplangt. Dem Lëtzebuerger Land hat hien awer an der Editioun vum 22. Mee gesot, den Informatioune vu senge Mataarbechter no wier de Projet komplett gewiescht. Et hätt een hie gleewen gedoen, datt alles kloer a virgesi gewiescht wier. Eréischt am Hierscht - also nom Vott vum Gesetz - hätt sech erausgestallt, esou den Etienne Schneider am Land, datt net alles esou kéint gemaach ginn, wéi virgesinn.