Gesellschaft Lëtzebuerg kéint sech Lockerungen erlaben, esou de Santésdirekter
Den Direkter vun der Santé, de Jean-Claude Schmit stäipt der Regierung bei hirer Decisioun fir d'Restriktiounen nees opzelackeren, de Réck. Dat obwuel nach net gewosst ass, wéi een Effet d'Feierdeeg an d'Vakanz op d'Infektiounszuelen hunn. An obwuel de Gesondheetsministère an enger Nott un d'Deputéiert méi streng Restriktioune recommandéiert huet.
An där Nott, déi RTL publizéiert huet, steet, d'Zil vun der Regierungspolitik missten 120 bis 150 Neiinfektiounen den Dag sinn. Am Géigesaz zur Situatioun a Frankräich an Däitschland géif d'Tendenz bei den Neiinfektiounen zu Lëtzebuerg kloer no ënnen weisen, esou de Jean-Claude Schmit. Dofir kéint ee sech liicht Lockerungen erlaben. Déi wieren och ganz virsiichteg, esou den Direkter vun der Santé.
"Wann der lo kuckt, wat an Däitschland a Frankräich geschitt - am Moment sinn déi amgaang, deen anere Wee ze goen. Éischter Chifferen, déi eropginn. Dofir kënne mir eis de Moment erlaben, d'Saachen vläicht e bësse méi ze relachéieren, a mir maachen dat ganz, ganz virsiichteg. 't ass kloer, wa mer an deenen nächste Wochen erëm eng Tendenz hätten no uewen, musse mer erëm adaptéieren."
Méi zum Thema
Epidemiolog: "Couvre-feu ab 18 Auer a Schoulen zou"
Zuele vun Neiinfektioune sinn nach ëmmer ze héich, esou den Epidemiolog Michel Pletschette. Et dierft een d'Restriktiounen net ophiewen an iwwer Couvre-feu vun 18 Auer un an zoue Schoulen nodenken.
