Konventioun RTL-Staat Verkéiert Mediepolitik
RTL soll vun 2021 un eng direkt Subventioun vun zéng Milliounen Euro d'Joer kréien. DP, LSAP, déi gréng an CSV sinn domadder averstanen. RTL kann een an dësem Dossier nëmme felicitéieren. Mä iwwer d'Liichtfankegkeet, mat där d'Regierung, de Service des Médias an d'Chamber mat Steiergelder ëmginn, muss ee sech eescht Suerge maachen.
Fir t'éischt Fakte schaffen, an dann iwwer d'Feeler nodenken, déi ee gemaach huet: Doran ass d'Chamber zimlech gutt. Wann een d'Päerd vun hanne suedelt, ass dat kee Wonner. Esou huet d'Chamber et fäerdeg bruecht der Regierung en Optrag ze ginn, fir d'Konventioun tëscht Staat an RTL ze finaliséieren. A wann dat da bis a Stee gemeesselt ass, mécht d'Parlament sech am Mee gär generell Gedanken iwwer d'Mediepolitik zu Lëtzebuerg. Méi verkéiert kann ee Mediepolitik net ugoen.
Wéi ee Service Public fir Lëtzebuerg?
Fir RTL ass de Plang opgaangen: E kommerzielle Grupp, deem et alles anescht wéi schlecht geet, kritt vun den 2020er Joren un eng zousätzlech staatlech Ënnerstëtzung. D'Wuert zousätzlech ass hei wichteg, well et ass net déi éischt. Elleng den Immobilieprojet, deen RTL um Kierchbierg dierf verwierklechen, dierft deen een oder aneren Euro erabréngen, mä dat - wéi och de generelle Benefice vum RTL Group - gëtt mat Genoss aus der Diskussioun erausgelooss. Scheiklappen un an duerch.
Dobäi wier et eng gutt Geleeënheet gewiescht, fir eng wichteg Diskussioun iwwer den audiovisuelle Service Public zu Lëtzebuerg, woumat natierlech och de radio 100,7 als ëffentlech-rechtleche Radio zur Debatt gestanen hätt. Wat sinn d'Vir- an Nodeeler vum Service Public? Wat sollen d'Steierzueler dofir ausginn? Wéi eng Modeller hu sech am Ausland bewisen a wéi eng net? Wéi eng Struktur, Gouvernance a Kontroll ass déi bescht, fir e qualitativen a virun allem onofhängege Service Public ze garantéieren?
Fakte schafen ouni Fakten
Déi Diskussioun war net gewollt, genee sou wéineg wéi d'Diskussioun iwwer déi spezifesch Elementer aus der Konventioun tëscht RTL an dem Kommunikatiounsministère. Datt de juristeschen Avis eréischt ugefrot gouf, wéi d'Konventioun schonn ausgehandelt war, weist, datt de Kommunikatiounsministère an RTL sech scho laang Eens waren iwwer déi staatlech Subventioun, an datt eréischt a posteriori no de Justifikatioune gesicht gëtt, fir dat Ganzt an dréchen Dicher ze kréien.
An obwuel d'Chamber keen Abléck an detailléiert Konte krut; obwuel d'Chamber matkrut, datt inhaltlech näischt ännere soll, mä just zwou Alibi-Kommissioune bäigeprafft ginn; obwuel keng budgetär Evaluatioune virleien, wat eng richteg onofhängeg ëffentlech-rechtlech Tëlee kascht hätt, déi näischt mat engem kommerzielle Grupp ze dinn huet; obwuel déi dominant Stellung vum RTL Group am audiovisuelle Secteur domat a Bëtong gegoss gëtt, hunn déi véier gréisst Parteien an der Chamber der Regierung gréng Luucht ginn, fir de Konzessiounsvertrag ze finaliséieren.
Politik a privat Interessen
Dräi vun deene véier Parteien hunn en héichrangege Vertrieder am CLT-UFA-Verwaltungsrot fir sech do e klengen Nieweverdéngscht z'assuréieren. RTL, e private Konzern mat enger kommerzieller Betribslogik, hätt sech net besser kënnen uleeën.
Ganz anescht wéi d'Regierung an d'Parlament, déi eigentlech den Intérêt général misste virun Aen hunn, an net hiren eegenen oder dee vun engem private Konzern.
Méi zum Thema
10 Milliounen Euro d'Joer fir RTL Télé
De Kommunikatiounsministère consideréiert de Programm vun RTL Télé vun 2021 un als service public. Dofir wëll déi blo-rout-gréng Regierung de Staat mat enger direkter Subventionéierung engagéieren.
Eng Existenzgrondlag fir kleng Medien
Radio ARA fuerdert d'Schafe vun engem "Fong fir de Pluralismus vun den audiovisuelle Medien". De Staat misst gesellschaftlech relevant Inhalter an net just RTL ënnerstëtzen, seet de Robert Garcia.
Meenung
Input an Output
Haut ass de Weltdag vum Radio, engem vun de populäerste Medien iwwerhaapt. Den 100,7-Direkter mécht sech bei där Geleeënheet Gedanken iwwer déi Lëtzebuerger Radioslandschaft, a besonnesch de Service public.
Wéi eng Zukunft fir RTL Télé Lëtzebuerg?
An Zukunft soll de Staat den Defizit vun RTL Télé iwwerhuelen. Dobäi handelt et sech ëm eng onkloer Zomm a Milliounenhéicht pro Joer. De Konzessiounsvertrag soll an Zukunft och verkierzt ginn.
D'Viraussetzunge fir Vertraue schafen
Virum Hannergrond vun der Affär "RTL-Lunghi" mécht den ALIA-Direkter Romain Kohn d'Analys, datt d'Iwwerdroe vun ëffentleche Missiounen un ee privaten Acteur net gläichzesetze si mat "Service Public".
