Horesca kritiséiert d'Regierung "Just mir mussen de Fanger an de Mond stiechen"
Och d'Horesca ass net zefridde mat den annoncéierte Lockerunge vun de Corona-Restriktiounen. Den Horesca-Generalsekretär François Koepp versteet net, firwat datt d'Restauranten a Caféë musse bis Enn vum Mount zoubleiwen, wann d'Geschäfter neess därfen opmaachen. An och net, datt de Couvre-Feu no hanne verréckelt gëtt, wann d'Leit sech haptsächlech am private Kader géifen ustiechen - net am Restaurant.
Bei him géife sech vill Patroen mellen, déi géifen zoumaachen. D'Horesca fuerdert dofir datt d'Betriber de Verloscht vun hire Revenuen kompenséiert kréien. D'Grondgesetz géif jiddferengem d'Recht ginn, fir seng Proprietéit ze notzen, dat wier fir d'Horesca-Betriber momentan awer net de Fall. Dat géif dem François Koepp no enger Enteegnung gläich kommen.
"An deem Kader seet d'Grondgesetz am Artikel 16, datt de Staat dat muss imdemniséieren à juste titre. Ma da musse mer wann ech glift, eise Revenu dee mer verluer hunn, och indemniséiert kréien. Et ka jo net sinn, datt mir andauernd musse ginn. Mir musse solidaresch sinn. Mir mussen drun denken an mir mussen verstoen, datt alleguer déi aner däerfe schaffen a just mir mussen de Fanger an de Mond stiechen."
Méi zum Thema
Xavier Bettel: D'Politik muss e Kompromëss fannen
De Premier Xavier Bettel verdeedegt d'Decisioun vun der Regierung, fir eenzel Restriktiounen ze lackeren. Et misst een awer och séier reagéiere kënnen, wa beispillsweis an dräi Wochen d'Zuelen erëm an d'Luucht géife goen.
Lëtzebuerg kéint sech Lockerungen erlaben, esou de Santésdirekter
De Jean-Claude Schmit stäipt der Regierung bei hirer Decisioun fir d'Restriktiounen nees opzelackeren, de Réck. Dat obwuel nach net gewosst ass, wéi een Effet d'Feierdeeg an d'Vakanz op d'Infektiounszuelen hunn.
Schoulen, Crèchen a Commercë ginn op, Horesca bleift zou
Ënner anerem ginn d'Schoulen an d'Crèchen den 11. Januar nees op, de Couvre-feu gëtt vun 21 op 23 Auer geréckelt an d'Restriktiounen am Sport an am Kultursecteur gi gelackert. D'Horesca bleift bis den 31. Januar zou.
Commerce, Schoulen a Crèchë sollen den 11. Januar nees opgoen
100,7-Informatiounen no diskutéiert d'Regierung um Dënschdeg doriwwer fir verschidde Secteuren nees opzemaachen, well d'Zuel vun de Corona-Neiinfektiounen erofgaangen ass.
Epidemiolog: "Couvre-feu ab 18 Auer a Schoulen zou"
Zuele vun Neiinfektioune sinn nach ëmmer ze héich, esou den Epidemiolog Michel Pletschette. Et dierft een d'Restriktiounen net ophiewen an iwwer Couvre-feu vun 18 Auer un an zoue Schoulen nodenken.
