Klimawandel IPCC-Rapport "ee kloert Alarmsignal"
Den IPCC-Rapport wier e kloert Alarmsignal, dat een elo net méi dierft ignoréieren, esou d'Ëmwelt- a Klimaministerin Carole Dieschbourg. D'Emissioune vun Zäregase misste weltwäit reduzéiert ginn. Lëtzebuerg hätt awer schonns op nationalem Niveau eng ganz Réi vu Mesuren en place gesat fir hei seng Hausaufgaben ze maachen. Och international wéilt ee bei der nächster Klimakonferenz am November a Schottland Positioun ergräifen.
D'Ëmwelt- a Klimaministerin Carole Dieschbourg ass sech sécher: Lëtzebuerg wier gutt opgestallt fir bis 2030 seng CO2-Emissiounen ëm 55 Prozent ze reduzéieren - a bis 2050 d'Klimaneutralitéit ze erreechen.
Heifir géingen et aktuell eng ganz Réi Instrumenter ginn, ewéi zum Beispill de Klimapakt 2.0 fir Gemengen. Och den eenzele Bierger wier net vergiess ginn, zum Beispill bei der Dekarboniséierung vum Transport oder awer "d'Haiser esou ze sanéieren, datt mir zukünfteg och Produzent gi vun erneierbaren Energien". D'Carole Dieschbourg ënnersträicht, datt et do Bäihëllefe vum Staat ginn.
Op der Klimakonferenz Cop26, déi am November zu Glasgow ass, géif Lëtzebuerg konkret Positioun ergräifen. Et géif kucken, datt duerch déi Emissiounsmäert, déi solle global entscheet ginn, net weider Bëscher ofgeholzt ginn.
Lëtzebuerg wéilt och op diplomateschem Niveau hëllefen:
"Mir wäerte sécherlech och als Bréckebauer aktiv sinn. Lëtzebuerg ass mat sengen Ausgabe pro Kapp wat déi international Klimafinanzéierung ugeet an de Bäistand dee mir deene Vulnerabelsten, den Inselstaaten awer och eise Partnerlänner vun der Kooperatioun ginn, ee vun deene Länner déi international ganz, ganz aktiv sinn."
Nëmmen als kollektiven, internationalen Effort wieren d'Klimaziler ze erreechen - a wéi dréngend dat wier hätt den IPCC-Rapport jo elo schwaarz op wäiss gewisen, esou d'Carole Dieschbourg.
Méi zum Thema
"Et steet zweiwelsfräi fest"
Am Weltklimarapport wieren d'Wëssenschaftler sech eens, datt d'Äerderwiermung integral op de Mënsch zeréckzeféieren ass, seet den Andrew Ferrone. Et wier awer nach net ze spéit fir d'Äerderwiermung ze bremsen.
Robert Vautard: "Urgent Reduktiounen, soss ass et ze spéit"
D'Zil vu enger Äerderwiermung vu maximal 1,5 Grad Celsius kann erreecht ginn, wann elo séier gehandelt gëtt, seet de franséische Klimafuerscher Robert Vautard. Hien ass ee vun den Auteure vum neie Weltklimarapport.
