Geplangten Ännerungen um Covid-Gesetz Horesca fuerdert e kloren Text
Fir d'Horesca mussen nach Detailer gekläert ginn, wat déi nei Limitatioun vun 100 Clientë pro Restaurant ugeet. Dat seet de Generalsekretär vun der Horesca François Koepp. Et misst beispillsweis gekläert ginn, ob Hoteller, déi méi wéi ee Restaurant an engem Gebai hunn, déi zwee Lokaler dierfe bedreiwen oder just een.
Evenementer wéi Hochzäite wieren an der leschter Zäit och "reieweis annuléiert ginn", wat e groussen Impakt op d'Recettë vun de Betriber hätt. Mee och méi kleng Reservatioune wieren no de rezente Pressekonferenze vun der Regierung annuléiert ginn.
Och wat déi nei Mesurë fir d'Grandes Surfacen ugeet, wou just nach ee Client op zéng Meter Carré soll zougelooss, misst den Text nach am Detail gekuckt ginn. Dat seet den Direkter vun der CLC, den Nicolas Henckes. D'Gäng an de Galerië géifen zum Beispill net matgezielt ginn. Am Text wieren och nach aner Ausnamen ageschriwwen.
"Mee esou bal dann eng Persoun vun der Galerie an e spezifescht Geschäft géing eragoen, da misst een do natierlech op déi Densitéit oppassen. A wann déi Persoun dann duerno an e Supermarché geet, deen an där Galerie ass, da muss och gezielt ginn. Mee vun der Galerie selwer als groussen Ensembel misst dat da warscheinlech net esou zielen."
Méi zum Thema
"Lycéeë behalen en Deel vun hirer Autonomie"
D'Maskeflicht bei méi wéi véier Leit an engem Raum wäert net fir d'Schoule gëllen, esou den Educatiounsminister Claude Meisch. Ob am Klassesall eng Mask muss ugedoe ginn oder net, bleift deemno eng autonom Decisioun vun de Lycéeën.
"Perfektioun gëtt et am Kampf géint dee Virus net"
An der Chamber herrscht kee Konsens, wéi d'Corona-Infektiounszuelen am Beschten nees kënne reduzéiert ginn. De Mars Di Bartolomeo hofft, datt d'Chamber déi nei Corona-Mesurë séier ka stëmmen - trotz ville Kritikpunkte vun der Oppositioun.
