Gemengesyndikat Héichwaasser: D'Gemenge wëllen e bessere Warnsystem
De President vum Gemengesyndikat Syvicol fuerdert, datt Léieren aus dem Héichwaasser virun engem Mount gezu ginn: et misst zum Beispill e bessere System fonnt gi fir d'Leit fréizäiteg ze warnen, wann d'Waasser klëmmt, esou den Emile Eicher.
An anere Länner géif et deelweis schonn esou Warn-Systemer ginn, seet den Emile Eicher. Am Taiwan hätt hie selwer esou ee System materlieft, wou d'Leit ee Message op den Handy geschéckt kritt hunn.
"Dat sinn d'Technologien, dofir brauch ee keng App. Déi Message ginn automatiséiert un all ageschalten Handy vum Netz vun där Regioun, déi betraff ass."
Den Emile Eicher ass och der Meenung, datt méi kloer misst gekläert ginn, wéi eng Roll d'Gemengen ze spillen hunn, wann d'Rettungsdéngschter vum CGDIS a Katastrophesituatiounen zum Asaz kommen. "Dat muss ee vläicht nach verfeineren", esou de President vum Syvicol.
A senger Gemeng hätt d'Koordinatioun mam CGDIS wärend dem Héichwaasser zwar ganz gutt geklappt, dat wier awer net iwwerall de Fall gewiescht, esou den Emile Eicher, dee selwer Buergermeeschter zu Clierf ass.
An der Mediathéik:
LauschterenMéi zum Thema
Héichwaasser: "Mir mussen d'Kommunikatioun kritesch iwwerdenken"
Den Direkter vum Waasserwirtschaftsamt wëllt d'Aart a Weis wéi virun Héichwaasser gewarnt gëtt "kritesch iwwerdenken". Bis elo hätt een d'Populatioun haaptsächlech iwwer inondations.lu gewarnt - an Zukunft misst een awer méi op d'soziale Medie setzen.
D'Leit bei enger Katastroph besser informéieren
Fir d'Bevëlkerung am Fall vun enger Naturkatastroph méi séier ze informéieren, schafft am Inneministère en Aarbechtsgrupp un enger Léisung. Et wéilt een ewech vun der GouvAlert-App, seet d'Taina Bofferding.
Oppositioun fuerdert Etüd iwwer d'Iwwerschwemmungen
Déi offiziell Warnung iwwer d'Iwwerschwemmunge wier scheinbar net mat Zäit bei der Bevëlkerung ukomm, esou déi véier Oppositiounsparteien, déi elo eng extern an onofhängeg Etüd iwwer d'Virfäll fuerderen.
CGDIS: Warnsystem an Austausch verbesseren
Den Direkter vun den Operatioune vum CGDIS wëllt den Echange mat de Gemenge verbesseren. Den Tom Barnig betount awer, datt déi Zesummenaarbecht op lokalem Niveau an de meeschte Fäll gutt geklappt hätt.
