CSSF Gros vun Immobiliekreditter gëtt zeréckbezuelt

D'Vertrieder vun der CSSF waren an der Chamberfinanzkommissioun, fir Erklärungen ze ginn, zum Reglement mat deem vu Januar un d'Konditioune fir Immobiliekreditter verschäerft ginn. D'Banken däerfen hire Clienten dann net méi iwwer 100 Prozent vum Akafspräis vum Haus oder Appartement léinen.

Finanzstabilitéit wier geséchert

Den Undeel vun de Kreditter, déi net zeréckbezuelt ginn, sot de Gilles Roth vun der CSV, géif sech iwwer déi lescht Jore gekuckt, op manner wéi ee Prozent belafen. An deene seelene Fäll, wou et zu enger Zwangsstee kéim, géifen d'Banken "deen Découvert vun de Prêten, deen se haten eigentlech nach duerch déi Immobilieverkeef gedeckt" kréien.

Dat ass logesch, esou laang wéi d'Präisser erop ginn an de Wäert vun den Immobilie klëmmt. Fir de Roy Reding vun der ADR ass de Risiko doduerch am Moment null.

Am Gesetz, op deem d'Decisioun fir d'Kreditkonditiounen ze verschäerfe berout, steet awer, datt esou Mesurë just kenne geholl ginn, wann et schwéier Dysfonctionnementer am Finanzsecteur ginn.

Reglement net fir Wettbewerbsverzerrung do

Tëschent den Zeilen hätt d'CSSF awer och duerchblécke gelooss, esou de Gilles Roth, datt et Konkurrenz ëm d'Clientë tëschent de Banken géif ginn.

Dat confirméiert de Roy Reding, ënnersträicht awer, datt "dat Instrument do ass jo net gemaach, fir Wettbewerbsverzerrungen z'ënnerbannen, mee fir risques systémiques auszeschléissen. An ech gesi kee risque systémique."

Wärend de Gilles Roth fäert, datt et mat den neie Reegele méi schwéier gëtt fir d'Leit fir sech eng Wunneng ze kafen, mengt de Roy Reding, datt dat neit Reglement net vill ännere wäert.