Waringo-Rapport Gros vu Recommandatioune gëtt an nächster Zäit ëmgesat
Ronn 90 Prozent vun de Recommandatioune vum Jeannot Waringo a sengem Rapport iwwer de groussherzoglechen Haff sollen an nächster Zäit ëmgesat ginn, mam Accord vum Grand-Duc: dat huet de Xavier Bettel de Mëtteg op senger Pressekonferenz ugekënnegt. Aner Changementer bräichte méi Zäit, well nach Detailer missten ausgeschafft ginn.
D'Pressekonferenz vum Xavier Bettel ganz lauschteren
De Grand-Duc Henri wier mat alle proposéierten Ännerungen averstanen, huet de Premier no senger Entrevue mam Staatschef gëschter preziséiert. Aner Changementer bräichte méi Zäit, well nach Detailer missten ausgeschafft ginn, seet de Xavier Bettel:
"Et si verschidde Saache wou nach Diskussioune lafen. [...] Mee et gëtt keen Njet vum Grand-Duc op iergendengem Punkt, wou de Grand-Duc seet, dat dote kënnt net a Fro. Ech hunn et hei mat engem Uspriechpartner ze dinn, dee weess, datt et hei net drëms geet eng Hetzcampagne ze maachen, mee au contraire eng Legitimitéit, eng Institutioun ze stäerken an ze evitéieren, datt se an d'Kritik och kënnt."
Bei de geplangten Ännerunge geet et ëm d'Personalgestioun um Haff, ëm d'Struktur an d'Opdeelung vum Offiziellem a Privatem, grad wéi ëm Froe vu Budget a Finanzen.
De Bäitrag vum Serge Kesseler lauschteren
Bei de Recommandatiounen a Saache Finanze vum Haff géif et dem Premier no e kloert Leitmotiv ginn:
"All Depense, déi a Relatioun sti mat der offizieller Funktioun vum Grand-Duc mussen transparent, novollzéibar an no de Reegele vum Staat geréiert a kontrolléiert kënne ginn. An da gi se och duerch de Staatsbudget finanzéiert."
Vun 2021 u soll den Haff een Aktivitéitsrapport publizéieren.
Monarchie als Staatsform bäibehalen
De Xavier Bettel huet och gesot, hie géif den Esprit vun de Recommandatiounen am Waringo-Rapport deelen: hie stéing zur Monarchie, dat wier déi richteg Staatsform. Hien hätt de feste Wëllen d'Monarchie ze stäerken.
D'Monarchie soll gestäerkt ginn, duerch Verbesserungen, méi Transparenz an eng Upassung un dat 21. Joerhonnert. D'Zil wier e "Lëtzebuerger Modell, dee gutt funktionéiert", esou d'Conclusioun vum Premier Xavier Bettel.
Geplangt wier ënner anerem een neien Organigramm beim Haff anzesetzen, deen d'Posten an d'Responsabilitéite kloer soll verdeelen, esou de Xavier Bettel:
"Een Organigramm gëtt elo festgehalen, en ass nach net fäerdeg. Mee ech kann Iech just soen, datt an deem Organigramm - dat, wat den Här Waringo och seet - fir mech heescht, datt d'Grande-Duchesse do keng Plaz méi huet, op jiddwer Fall an der administrativer Organisatioun vum Haus."
Méi zum Thema
Kommentar
Nach eng Fenster, fir grouss opzemaachen
De Waringo-Rapport hält kloer Mëssstänn um Haff fest. Domat geet fir de Premier Xavier Bettel a seng Regierung eng Méiglechkeet op, fir als Moderniséierer opzetrieden, mengt d'Michèle Sinner.
"D'Regierung ass gefuerdert"
Et muss gehandelt ginn, an zwar direkt: fir de fréieren CSV-Deputéierten a Verfassungsspezialist Paul-Henri Meyers ass dat d'Conclusioun, déi aus dem Rapport iwwer d'Finanz- a Personalgestioun um Haff ze zéien ass.
Alex Bodry: Eng "sachlech Grondlag fir ze handelen"
De Waringo-Rapport ass eng "sachlech Grondlag fir ze handelen", seet den Alex Bodry. Elo léichen all d'Donnéeën um Dësch, an elo misst gehandelt ginn, sou de Member vum Staatsrot.
Däitlech Kritik un der Grande-Duchesse
De Spezial-Representant Jeannot Waringo, dee vum Premierminister mat engem Rapport iwwer d'Personalgestioun vum Haff beoptraagt gouf, fuerdert a sengem Rapport iwwer d'Personalgestioun eng Rei Reformen.
