Assurancë-Kollektivvertrag Gewerkschafte fuerdere méi an der Pai
D'Verhandlunge fir en neien Assurancë-Kollektivvertrag hunn e Méindeg ugefaangen. D'Gewerkschafte fuerdere finanziell Verbesserunge fir déi Beschäftegt. Am Revendicatiounskatalog geet et awer och ëm de Maintien de l'emploi an ëm d'Entwécklung vun der Formatioun, seet d'OGBL-Zentralsekretärin Véronique Eischen dem radio 100,7. Och iwwer d'Digitalisatioun wéilt ee sech austauschen.
Et misst ee sécherstellen, datt d'Employéen eng Aarbecht kéinte behalen. D'Fro wier, wéi eng Plaze géife verluer goen a wou neier kéinten entstoen. D'Gewerkschafte fuerdere finanziell Verbesserunge fir déi dausende Beschäftegt am Assurancë-Secteur. Hei géifen et extrem gutt Zuele ginn, ënnersträicht d'Véronique Eischen vum OGBL-Syndikat Banken an Assurancen.
D'ACA géif dës Chifferen ze negativ duerstellen. D'Produktivitéit am Assurancë-Secteur wier extrem héich. Déi Beschäftegt hätten also een Deel vum Kuch ze gutt, seet d'Véronique Eischen. D'ACA, de Patroantsverband vun den Assurance- a Réassurance-Gesellschaften, wollt op Nofro hin näischt zum Inhalt vun de Kollektivvertragsverhandlunge soen, déi zënter e Méindeg lafen.
Dem OGBL no soll vu Januar un am Rhythmus vu 14 Deeg bis Enn Mäerz oder Ufank Abrëll viru verhandelt ginn. Et ass nach net sécher, ob den neien Assurancë-Kollektivvertrag erëm fir dräi Joer wäert gëllen.
Méi zum Thema
Prioritéit: Ausbildung
D'Ausbildung an d'Orientatioun mussen Top-Prioritéite vun der nächster Regierung ginn, seet de Romain Schmit vun der Handwierkerfederatioun. Hien zitt e gemëschte Bilan vun der aktueller Regierung.
"Formatioun ass Assurance géint de Chômage"
D'Aschreifkäschte fir de Brevet de Maîtrise sinn elo dräi Mol méi deier. D'Formatioun ass opgewäert ginn, argumentéiert de Vize-Generaldirekter vun der Handwierkerkammer Charles Bassing.
