Verfassungsreform Gérard Koneczny: Warscheinlech keng nei Referendumsinitiativen
De Gérard Koneczny geet net dovun aus, datt weider Initiative lancéiert gi fir d'Organiséiere vun engem Referendum iwwert déi dräi weidere Kapitele vun der Verfassungsrevisioun unzefroen. Dat huet de Member vum Comité d'Initiative haut am 100,7-Interview gesot.
Et war jo net gelongen, déi néideg 25.000 Ënnerschrëften zesummen ze kréien, fir datt et zu engem Referendum iwwert d'Justiz-Kapitel komm wier. Knapp 7.400 Leit haten dës Demande Enn vum leschte Joer ënnerstëtzt.
Eng Erklärung dofir wier, datt d'Gemengen "déi Saach net esou ënnerstëtzt hu wéi si sollten", esou d'Kritik vum Gérard Koneczny. "Dobäi kënnt, datt vill Leit warscheinlech Distanz geholl hunn, wéinst dem Impfgéigner, déi do ganz vill an deem Comité vertruede waren."
Net äussere wëllt de Gérard Koneczny, ob et gutt oder schlecht war, gemeinsam Saach mat den Impfgéigner an de Rei vum Comité d'Initiative ze maachen: dat kéint hien net beurteelen, esou den CSV-Member. Ausser dem President vum Comité géif hie kee vun deenen anere sechs Memberen direkt kennen.
Méi zum Thema
Referendum iwwer Justizkapitel: Net genuch Ënnerschrëften zesummekomm
An de 97 Gemenge déi d'Lëschte schonn ofginn hunn, wieren ëm déi 7.000 Signaturen zesummekomm, sou de Staatsministère. Et gesäit also esou aus, wéi wann d'Zil vun der Initiativ däitlech verfeelt gi wier.
Dat neit Justizkapitel kéint am Januar vun der Chamber ugeholl ginn
Am Januar kéint d'Aarbecht un der Verfassungsreform weider decisiv Schrëtt viru kommen, mengt de President vun der zoustänneger Chamberkommissioun, den LSAP-Deputéierte Mars Di Bartolomeo.
