Urgence Geolokalisatioun un den 112 weiderschécken
An Zukunft soll bei Noutriff iwwer Handy d'Geolokalisatioun automatesch un den 112 mat geschéckt ginn. Dat gesäit een entspriechende Gesetzesprojet vir, deen eng europäesch Direktiv ëmsetze soll. Doduerch soll d'Aarbecht vun de Rettungsdéngschter ënner anerem méi séier a méi prezis ginn, hofft de CGDIS.
De Bäitrag vum Françoise Keller lauschteren
De System funktionéiert den Ament just bei zwee Betribssystemer, nämlech bei IOS an Android. Geschate 85 Prozent vun den Handye géifen awer mat deene Betribssystemer funktionéieren, seet de Christopher Schuh, Chef vun der operationeller Conduite beim CGDIS.
Méi séier d'Adress erausfannen
Et hätt een also potentiell 85 Prozent vun den Noutriff iwwer Handy geolokaliséiert, "wat eis am Alldag eng grouss Plus value wäert bréngen", seet de Christopher Schuh, "well notamment bei Verkéiersaccidenter mir d'Adress oder d'Lokalisatioun vill méi schnell hunn, wéi mir et haut hunn."
Hien hofft, datt och aner Betribssystemer dee Standard iwwerhuele wäerten. Bis dohinner hätt den 112 awer och d'Méiglechkeet fir iwwer ee Link, deen de Betraffene geschéckt kritt, seng Lokalisatioun erauszefannen. Allerdéngs just, wann eng Internetconnectioun besteet.
D'Lokalisatioun einfach iwwerdroen
Den Ament wier esou eng automatesch Geolokalisatioun hei am Land just méiglech bei engem Noutruff iwwer déi staatlech Applikatioun GouvAlert. Zum Beispill bei enger Persoun, déi sech am Bësch blesséiert oder verluer huet, esou de Christopher Schuh. Contraire zu dem geplangte System muss den Notzer vu GouvAlert awer déi entspriechend App eroflueden a gebrauchen.
An Zukunft misst ee just an engem Telefonsreseau sinn, an zwar net forcement vu sengem Provider, seet de Christopher Schuh:
"Dat heescht, wann ee Client ass bei engem Reseau A, an et huet een ebe keen Netz, kann een awer probéieren den 112 unzeruffen. Wann op där Plaz een anere Reseau ass vun engem Konkurrent, da geet den 112 Noutruff iwwer all Netzer an en ass jo och gratis."
D'Donnéeë solle bannent 24 Stonne gehale ginn. Et géif ee sech hei un änleche Reegelen aus dem Ausland orientéieren. Déi automatesch Geolokalisatioun bei Noutriff wäert iwwerdeems un den 112 weidergoen, och wann d'Lokalisatiounsfunktioun um Handy ausgeschalt ass. Dat géifen d'Betribssystemer elo scho virgesinn, esou nach de Christopher Schuh vum CGDIS.
Méi zum Thema
2019 goufen et manner Verkéiersdoudeger
22 Mënschen hunn 2019 hiert Liewen op de Stroosse verluer: en historesch niddregen Niveau. De François Bausch schwätzt vun enger gudder Nouvelle, d'AVR hofft, datt ee bei enger niddreger Zuel bleift.
Verstäerkung fir de SAMU
Spéitstens vum nächsten 1. Mee u wäert de Rettungs-Helikopter vun der Air Rescue de SAMU verstäerken. Dee géif dat fënneft Standbeen vum Service fir dréngend medezinesch Hëllef ginn, sou de CGDIS-Direkter Paul Schroeder.
Wéi funktionéieren d'Rettungsdéngschter um Terrain?
De Corps grand-ducal d'incendie et de secours (CGDIS) feiert säin éischte Gebuertsdag. Virun engem Joer ass d'Reform am Rettungswiesen ugelaf. De Maurice Molitor war am Asaz-Zenter zu Esch.
E véierte SAMU
Deen neien CGDIS, den nationale Corps vun de Rettungsdéngschter, denkt driwwer no fir e weidere SAMU unzeschafen. Dëse soll am ganze Land agesat ginn, seet de Generaldirekter vum CGDIS Paul Schroeder.
