Nom Sommet zu Cornwall G7 wëllt eng Milliarden Dosisse verdeelen

De Sommet, dee vum brittesche Premier Boris Johnson organiséiert gouf, war deen éischten zanter dem Ufank vun der Corona-Pandemie. Den Joe Biden hat de Retour vun den USA op der internationaler Bün versprach, a seng Kolleegen aus Groussbritannien, Däitschland, Frankräich, Italien, Japan, a Kanada, konnten hir Erliichterung kaum verstoppen, datt d'Era vum Donald Trump eriwwer ass. Hien hat mam America-First-Dogma fir Chaos an den traditionellen Allianze gesuergt, souwuel am G7 wéi och an der NATO.

De Multilateralismus, d'Diplomatie, d'Zesummenaarbecht mat alliéierte Länner, dat soll déi nei an al Politik vun den USA sinn. Den US-President Joe Biden huet ënnerstrach, datt déi eenzeg Aart a Weis fir déi Geforen unzegoen wier et, wann ee mat senge Partner an Alliéierten zesumme schafft.

"Ech hu menge G7-Kolleege gesot, datt mir eisen Deel dozou bäidroe wäerten. Amerika sëtzt nees um Dësch."

Méi oder wéineger konkret Accorden

Um G7-Sommet koum et zu Accorden, e puer konkret, anerer manner, mee op d'mannst ouni Sträit. Den Don vun enger Milliard Dose vum Vaccin gouf vum Boris Johnson gefeiert, mee vun der Weltgesondheetsorganisatioun als inadequat kritiséiert. 11 Milliarden Dose missten hir, fir 70 Prozent vun der Weltbevëlkerung ze impfen.

De Kampf géint de Klimawandel sollt ee vun de grousse Sujete sinn, mee d'Versprieche vun dëse siwe Länner wäert kaum direkt Konsequenzen hunn. Et muss ee wuel op d'Klimakonferenz zu Glasgow dëst Joer waarde fir genee Mesuren.

D'Staats- a Regierungscheffen hunn och hiren Accord gi fir d'Minimalbesteierung vun op d'mannst 15 Prozent fir déi gréisst multinational Entreprisen. Och dat ass bis elo just en Accord a keng konkret Moossnam.

Stäerkt mat Alliéierte weisen

Et war och de But vum Joe Biden eng gemeinsam Front ze weise fir Russland a China ze bremsen. Eng nei Infrastruktur-Initiativ soll de risege chineesesche Projeten an Afrika, Asien, an Europa Konkurrenz maachen. Eng amerikanesch Iddi, déi vum Rescht vum G7 adoptéiert gouf.

Déi amerikanesch Taktik gëtt haut warscheinlech vun de NATO-Memberlänner zu Bréissel ëmaarmt. Russland ass déi grouss Gefor fir d'transatlantesch Allianz, dat wäert hei zu Bréissel nach eng Kéier ganz kloer gemaach ginn.

De Sommet soll eng weider Etapp ginn an enger Europarees vum Joe Biden, déi mam Treffe mam russesche President Vladimir Putin ophale wäert. Wärend enger ganzer Woch wëllen d'USA weisen, wéi staark déi traditionell Allianze sinn, staark genuch, fir Russland um politeschen a militäreschen Niveau ze bremsen.

Den amerikanesche President gesäit seng NATO-Partner e puer Méint virum Ofzuch vun den amerikaneschen an de NATO-Truppen aus dem Afghanistan. Dee längste Krich an der Geschicht vun den USA huet d'NATO elo bal zwanzeg Joer laang beschäftegt. An e puer Méint soll dat Kapitel ofgeschloss ginn, virum 11. September, dem 20. Anniversaire vun den Terror-Ugrëff vun Al-Qaeda an den USA.