Franséisch Presidentiellen 2017 Macron a Le Pen am zweeten Tour

Am zweeten Tour de 7. Mee hunn d'Franzouse bei de Presidentschaftswahlen de Choix tëscht dem sozial-liberalen an 39 Joer alen Emmanuel Macron an dem Marine Le Pen, 48 Joer al Kandidatin vum rietsextreme Front National.

Dem Inneministère no si 97 Prozent vun de Stëmmen ausgezielt:

1. Emmanuel Macron (En Marche): 23,86 %
2. Marine Le Pen (Front National): 21,43 %
3. François Fillon (Les Républicains): 19,94 %
4. Jean-Luc Mélenchon (France Insoumise): 19,62 %
5. Benoît Hamon (Parti Socialiste): 6,35 %

Déi aner fënnef Kandidate krute manner wéi fënnef Prozent vun de Stëmmen.

Wahlkampf geet weider

Den Emmanuel Macron sot no senger Victoire am éischten Tour, bannent engem Joer wier et der Bewegung "En marche" gelongen, d'Gesiicht vum politesche Liewen a Frankräich ze veränneren. D'Fransousen hätte sech fir ee Changement entscheed an déi zwou Parteien ecartéiert, déi d'Land an de leschten 30 Joer regéiert hunn.

Vun elo u wier et seng Aufgab all d'Fransousen ze rassembléieren, esou den Emmanuel Macron: "Ech kennen är Erwaardungen. An ech wëll an zwou Wochen äre President sinn."

Favorit am zweeten Tour

Eng Ëmfro vun Ipsos-Sopra Steria huet erginn, datt den Emmanuel Macron am zweeten Tour ronn 62 Prozent vun de Stëmme géif kréien.

D'Droite, d'Sozialisten an d'Ecologisten hunn opgeruff fir am zweeten Tour fir den Emmanuel Macron ze stëmmen.

Eng Rei Lëtzebuerger Politiker hunn dem Emmanuel Macron fir säi Resultat am éischten Tour felicitéiert, dorënner den EU-Kommissiounspresident Jean-Claude Juncker an de Premier Xavier Bettel:

.@JunckerEU a félicité @EmmanuelMacron pour son résultat au premièr tour et lui a souhaité bon courage pour la suite. #Presidentielle2017

— Margaritis Schinas (@MargSchinas) April 23, 2017

Heureux qu @EmmanuelMacron représente au second tour les valeurs démocratiques et européennes que je partage.XB

— Xavier Bettel (@Xavier_Bettel) April 23, 2017

Le Pen hofft op "Parioten"

D'Marine Le Pen sot, elo wier déi "éischt Etapp" fir an den Elysée-Palais gepackt. Si géif de Wieler d'Méiglechkeet vun enger wierklecher Alternance proposéieren, esou d'Presidentin vum Front National.

Et wier am Wahlkampf alles gemaach ginn, fir datt iwwert déi eigentlech politesch Erausfuerderungen net hätt kënnen diskutéiert ginn. Dat kéint an den nächsten zwou Wochen endlech geschéien.

Si huet d'Franzousen opgeruff, fir d'"Opportunitéit" ze notzen a sech géint eng "mondialisation sauvage" ze wieren, déi eng Gefor fir d'Zivilisatioun wier.

"Je suis la candidate du peuple. Je lance un appel à tous les patriotes, d'où qu'ils viennent." #Présidentielle2017

— Marine Le Pen (@MLP_officiel) April 23, 2017

Historesche Moment

D'Néierlag vun den zwou grousse Regierungsparteien, dem Parti Socialiste a Les Républicains, ass historesch: Nach ni hunn d'Kandidate vun de Sozialisten an de Konservativen esou mann Stëmme kritt wéi des Kéier.

De Sozialist Benoît Hamon huet als éischte vun den 11 Presidentschaftskandidaten reagéiert:

J’ai échoué à déjouer le désastre qui s’annonçait. J’en assume pleinement la responsabilité.

— Benoît Hamon (@benoithamon) April 23, 2017

De Benoît Hamon huet d'Marine Le Pen als "Feindin vun der Republik" bezeechent an d'Wieler dozou opgeruff am zweeten Tour fir den Emmanuel Macron ze stëmmen.

Och de François Fillon sot um Wahlowend, hie géif am zweeten Tour fir den Emmanuel Macron wielen. De Front National wier fir seng Gewalt a seng Intoleranz bekannt. De Wahlprogramm vum Marine Le Pen géif Frankräich an d'Faillite an Europa an de Chaos stierzen, esou de Fillon.

Mélenchon: Keen Opruff

De Jean-Luc Mélenchon huet keng Wahlrecommendatioun fir de 7. Mee gemaach. De lénke Kandidat huet sech vu béide Kandidaten am zweeten Tour distanzéiert, déi allebéid wéilten déi aktuell Institutiounen erhalen an keen ecologeschen a soziale Fortschrëtt géife proposéieren.

Nous interrogerons les 450 000 insoumis sur leur choix au second tour. Les résultats seront rendus publics. #Presidentielle2017

— Jean-Luc Mélenchon (@JLMelenchon) April 23, 2017

Wahlparticipatioun

47 Millioune Fransouse waren opgeruff hire Bulletin ofzeginn. D'Participatioun beim éischten Tour vun de Presidentewahle gëtt op 78,2 Prozent geschat. Mat 21,8 Prozent géif d'Abstentioun deemno liicht iwwert dem Taux vun 20,52 Prozent am éischten Tour vun de Presidentiellen 2012 leien.