Ëmstridde Reform Frankräich: Grouss Demonstratiounen géint Rentereform

A Frankräich gëtt haut massiv géint déi ëmstridde Rentereform manifestéiert a gestreikt. Besonnesch den ëffentlechen Transport an den Enseignement si staark betraff. De Streik soll awer just den Ufank vun der Mobilisatioun sinn, sollt d'Regierung un hire Pläng festhalen.

Max Tholl (Paräis) / cbi

Streik
Vill TGVe wäerten haut ausfalen. Foto: picture alliance / Marijan Murat/dpa | Marijan Murat (Archiv)

Lauschteren


Zanter Wochen hunn déi franséisch Gewerkschaften eng grouss Mobilisatiounswell en vue gestallt, sollt d'Regierung plangen den Rentenalter op 64 Joer ze erhéijen.

Iwwer 200 Demonstratiounen am ganze Land

No der Ukënnegung vun der Premierministesch lescht Woch, ass et haut dann den éischte grousse Streik géint d'Reform. Besonnesch den ëffentlechen Transport an de Fernverkéier si staark betraff, deelweis fiert just all zéngten Zuch oder all fënneften TGV.

Um Paräisser Flughafen Orly huet ee vu fënnef Flich missen annuléiert ginn. Och am Enseignement streiken ënner anerem schätzungsweis 70 Prozent vum Léierpersonal an de Primärschoulen. Doniewent sinn d'Fonction publique, de Gas, Pëtrol an Elektricitéitssecteur wéi och d'Police an de Gesondheetssecteur betraff. Der Gewerkschaft CGT no ginn et iwwerdeems nach 200 Manifestatiounen uechtert Land.

Eréischt den Ufank vun de Streiken

Et ass zanter 12 Joer déi éischte Kéier, datt all aacht grouss Gewerkschaftsverbänn zesummen zu engem grousse Streik opruffen. De Virsëtzende vun der CGT, de Philippe Martinez huet scho gefuerdert, datt de Streik soll verlängert ginn, och vun anere Gewerkschaften ass ze héieren, datt et just den Ufank wier, sollt d'Regierung hier Reformpläng ëmsetze wëllen.

Ënnerstëtzung kréien d'Gewerkschafte vun de lénks-gréngen Oppositiounsparteien, déi dem President a senger Regierung de Kampf ugesot hunn. D'Premierministesch Elizabeth Borne hat virgëschter nach eemol festgehalen, d'Reform wier am Dialog mat de Sozialpartner entstanen an net eleng vun der Regierung opgestallt ginn. Sondagen no sinn ongeféier 67 Prozent vun der Populatioun géint d'Rentereform.

Méi zum Thema

Emmanuel Macron
Frankräich

2023 waarde vill Erausfuerderungen op de franséische President Emmanuel Macron a seng Regierung: de Pensiounsalter soll erhéicht ginn. Och eng Reform vun der Immigratioun steet um Plang.

Net verpassen

Programm

Dossieren

  • Chamberwalen 2023

    Den 8. Oktober gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

  • Gemengewalen 2023

    Den 11. Juni gëtt an de verschiddene Gemenge vum Land en neie Gemengerot gewielt. Wéi eng Sujete dominéieren d'Wal a wéi verleeft de Walkampf an de vereenzelte Gemengen?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen