Lëtzebuerg seet Äddi Fëschbech, d'Residenz vum Grand-Duc Jean

De leschten Donneschdeg gouf e Rousekranz fir de Grand-Duc Jean an der Fëschbecher Kierch deposéiert. E Brauch, dee bei all Bierger vu Fëschbech praktizéiert gëtt. Mëtt Mee soll dann eng speziell Zeremonie fir de verstuerwene Staatsmann an der Fëschbecher Kierch ofgehale ginn. De Maurice Antony huet sech mam aktuelle Buergermeeschter Frank Daems ënnerhalen.

Maurice Antony / cz

Schlass Fëschbësch wikipedia.jpg
Foto: Wikimedia Commons

Haut - um Dag vum Begriefnes - hätten déi Fëschbecher Gemengeresponsabel keng Zeremonie zu Éiere vum verstuerwene Grand-Duc virgesinn, esou de Buergermeeschter Frank Daems. Dofir wier de Buergermeeschter awer als geluedene Gaascht op dem Staatsbegriefnes fir d'Gemeng Fëschbech ze vertrieden. Eng speziell Zeremonie zu Fëschbech soll et zu engem spéideren Ament ginn, esou de Frank Daems:

Mir hunn eng cérémonie d'adieu geplangt fir den 19. Mee zu Fëschbech an der Kierch, wou mir dann och an enger Mass dem Grand-Duc Jean wëlle Merci an Äddi soe fir alles, wat hie gemaach huet fir eist Land.

Dës Zeremonie gouf speziell fir de Grand Duc Jean aberuff a soll de Bierger vu Fëschbech d'Méiglechkeet bidden, hirem fréiere Matbierger ze gedenken.

Ech mengen, et ass eng Zeremonie fir de Grand-Duc Jean vun der Fëschbecher Gemeng, vun de Fëschbecher Leit. Mir erwaarden eis an éischter Linn, datt déi Fëschbecher Leit drun deel huelen. Ech wëll dat elo net virgesi fir dat ganzt Land. Mir hunn zwar eng grouss Kierch an dann awer och nees eng relativ kleng fir esou Geleeënheeten. Dat heescht, do sinn d'Plazen awer relativ begrenzt. Ech géif elo net den Opruff maachen fir d'ganzt Land. Ech zielen do op d'Versteesdemech vun de Leit.

Um Fëschber Schlass, der leschter Residenz vum Grand-Duc Jean si fir de Moment keng Aktivitéite geplangt, esou de Frank Daems. De Buergermeeschter erënnert sech un déi feierlech Arrivée vum Grand-Duc a senger Fra, der Grande-Duchesse Josephine Charlotte an der Gemeng Fëschbech am Joer 2002. Mat engem Gedenksteen gouf dëse Moment festgehalen.

Vun do un huet eise Grand-Duc Jean hei bei eis gewunnt. Mee hien huet net nëmmen hei gewunnt. Et däerf ee sech net virstellen, datt d'Schlassdieren ëmmer zou waren, an een hien net gesinn huet. Au contraire. Hien huet sech gären ënner d'Leit vun der Gemeng gemëscht. Dat heescht, hien huet och gären un de kulturelle Gemengenaktivitéiten deelgeholl, Buergbrennen zum Beispill, den Hämmelsmarsch, oder wann d'Kanner liichte koumen.

Gären hätt de fréiere Grand-Duc d'Leit zu esou Uläss op sengem Schlass empfaangen, esou de Frank Daems. Nieft der Kultur hätt de Grand-Duc sech awer och fir d'Gemengepolitik interesséiert a sech ëmmer als Deel vun der Gemeng Fëschbech verstanen. Un de Grand-Duc huet de Frank Daems nëmme gutt Erënnerungen.

De Grand-Duc Jean war ëmmer e léiwen, häerzlechen a formidabele Mënsch. An dat ass ëmmer iwwergesprongen op déi Leit, déi mat him ze dinn haten. Wann dir mat him geschwat hutt, dat ass guer net anescht gaangen. Hie war ëmmer fein, frëndlech, häerzlech a wëssbegiereg.

An der Mediathéik:

Aktuelles / / Maurice Antony
Lauschteren

Méi zum Thema

D'Leit stinn an der Schlaang fir dem Grand-Duc Jean Äddi ze soen
Grand-Duc Jean

Fir dem Grand-Duc Jean déi lescht Éier ze erweisen, sinn d'Leit an d'Chapelle Ardente vum Palais komm, bei de Sarg mam Grand-Duc senger opgeboerter Läich.

Programm

Net verpassen

  • Dëse Sonndeg um 11:00 LIVE aus der Congresshalle zu Saarbrécken

    DRP

    Eng Symphonie mat Piano - Esou gëtt dacks dem Johannes Brahms säin zweete Pianosconcerto beschriwwen. De russesche Pianist Nicolai Lugansky spillt dëst Wierk an där nächster Matinée vun der Deutschen Radio Philharmonie Saarbrücken Kaiserslautern, déi de radio 100,7 zesummen mat SR2 KulturRadio e Sonndeg, 15. Dezember 2019, vun 11.00 Auer u live aus der Congresshalle zu Saarbrécken iwwerdréit.

Dossieren

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun senge Bierger? Mir weise konkret Beispiller.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen