Industrie FEDIL: "Haut comité pour la promotion de l'industrie reaktivéieren"
Den Haut comité pour la promotion de l'industrie ënnerbreet der Regierung seng Recommandatiounen a konkret Propositiounen, déi d'Regierung analyséiert: Dat steet am aktuelle Regierungsprogramm ze liesen. Am Comité vertruede si verschidde Regierungsmemberen an aacht Vertrieder aus der Industrie. De Secteur huet e privilegéierten Zougang zum Wirtschaftsminister kritt, heescht et. Den Haut comité pour la promotion de l'industrie ass awer schonn zanter Enn November 2016 net méi aktiv. Firwat ass dat esou?
Gegrënnt gouf dësen Haut comité op Demande vun der Business Federatioun FEDIL: vun der CSV-LSAP-Regierung war de Comité am Februar 2013 an d'Liewe geruff ginn. Am Programm vun der aktueller Regierung vun Enn 2013 huet een de Comité erëmfonnt.
D'Vertrieder vum Secteur hunn am Laf vun dëser Legislatur-Period zesumme mam Wirtschaftsministère decidéiert, den Haut comité fir d'Promotioun vun der Industrie rouen ze loossen, erkläert de FEDIL-Direkter René Winkin.
Comité wéinst Rifkin op Äis geluecht
Virun annerhallwem Joer wier d'Fro opkomm, wéi d'Rifkin-Etüd ëmgesat gi soll. Déi Bedeelegt hu sech dunn dofir entscheet fir de Comité op Äis ze leeën, "awer an der Intentioun erëm weiderzefueren, an datt mir e géifen an enger liicht anerer Configuratioun, fir d'Ëmsetzung vun deene Conclusiounen aus der Etude stratégique Rifkin", seet de René Winkin.
Duerch den Haut Comité hat den Industrie-Secteur e privilegéierten Zougang zum Wirtschaftsminister. De René Winkin schléisst deemno net aus, datt dëse Gremium ënner enger neier Regierung kéint reaktivéiert ginn.
Den Haut Comité wier eng Méiglechkeet fir "ze soen, firwat brauche mir dat, firwat brauche mir et esou an net anescht. Et wier een effikasse Wee, fir mat de Fonctionnairen ze kommunizéieren, déi ee Sujet gutt kennen."
"Kee Think Tank, mee Decisiounen huelen"
Den Direkter vun der FEDIL gesäit den Haut Comité deemno net als e Think Tank. Néideg wier eng Configuratioun mat Leit, déi konstruktiv wéilte schaffe mat och Ministeren dobäi, déi Decisioune kënnen huelen.
Den Agenda wier ofgeschafft an an zwee Joer sollt een, dem René Winkin no, "erëm eng Kéier kucken, wat sinn elo nei Saachen, wou een erëm eng Kéier kéint op déi selwecht Aarbechtsmanéier fonctionnéieren, bzw. de Grupp reaktivéieren."
Den Image vun der Industrie bei deene Jonke verbesseren: dat wier eent vun den Ziler, déi erreecht goufen, esou de René Winkin. Och an de Beräicher Innovatioun, Fuerschung, Ëmwelt an Energie géifen et konkret Resultater ginn, duerch d'Aarbecht am Haut Comité. Beim Thema Aarbechtsorganisatioun a Besoine vun der Industrie hätten et awer keng Resultater ginn.
De Panorama-Bäitrag vum Serge Kesseler:
Méi zum Thema
Riicht Eraus
"Planungssécherheet extrem wichteg fir d'Betriber"
Déi nei Technologië bréngen nei Chancë fir d'Industrie, seet de FEDIL-Direkter René Winkin. Hie fuerdert eng sachlech Debatt iwwert déi méiglech Implantatioun vun neien Industrie-Betriber.
Lëtzebuerg gutt opgestallt?
De Lëtzebuerger Standuert huet kloer Virdeeler, seet den Direkter vun FEDIL, de René Winkin. Et misst awer och un d’Relève geduecht ginn an no enger qualifizéierter Main d’oeuvre gesicht ginn.
Industrie 4.0 begleeden
Dem Groupe Paul Wurth no, ass am Beräich Energie e grousst Ëmdenken amgaang. De Groupe huet en Incubateur lancéiert, fir Projeten an der Industrie “4.0” ze begleeden.
"Court-termisme" amplaz "Long-termisme"
Lëtzebuerg hätt ee Wirtschaftsmodell, dee net ëmmer ganz nohalteg wier. Där Meenung ass de Nicolas Soisson, den Direkter vun der FEDIL, deen am Januar an d’Pensioun geet.
