Corona-Kris EU wëllt Accès op Impfstoffer

D'Länner aus der Europäescher Unioun solle sech zesummen dinn, fir sech Impfstoffer géint de Coronavirus ze verschafen, fënnt d'Europäesch Kommissioun. Véier EU-Länner hunn awer schonn op eege Fauscht een Accord mat engem Impfstoff-Produzent ofgeschloss. Lëtzebuerg ass par rapport zu där Initiativ éischter skeptesch.

Danièle Weber / cz

ILlustratioun Vaacin COVID-19 SARSCoV2
Foto: Bigstock / StanG

D'Efforte fir een Impfstoff géint de Coronavirus ze entwéckele lafen op Héichtouren. Wéini een do ass, ass nach net gewosst. Mee d'Course fir Zougank zu deem Stoff ze kréien, huet scho laang ugefaangen. D'Europäesch Unioun soll sech do zesummendinn, fir besser verhandelen ze kënnen, seet d'Europäesch Kommissioun.

Mee och hei, wéi bei anere Geleeënheeten an der Corona-Kris, packt Bréissel et net esou richteg, d'Heft an d'Hand ze huelen.

Accord iwwer 400 Milliounen Dosen ënnerschriwwen

D'Kommissioun wollt dës Woch de Wee fir eng gemeinsam Strategie vu Bréissel weisen. E puer Deeg virun där Annonce sinn awer véier EU-Länner virun de Won gesprongen: E Samschdeg hunn Däitschland, Frankräich, Italien an Holland een Accord mat der Pharma-Entreprise AstraZeneca ënnerschriwwen, deen d'Liwwerung vu bis zu 400 Milliounen Dose vun deem Impfstoff sécherstellt, dee bis elo nach net do ass.

Et muss séier goen, betount den däitsche Gesondheetsminister op engem Online-Forum vun der ARD. Et wéilt ee sech elo schonn d'Produktiounscapacitéite sécheren, esou de Jens Spahn. Dowéinst hätt een dat gemaach, "wat d'ganz Welt mécht". Déi véier Länner hätte Sue virgestreckt a wiere prett, dee Risiko ze droe fir de Fall, wann et schif geet.

D'Kommissioun wëllt dat selwecht maachen, mee op europäeschem Niveau. Konkret proposéiert Bréissel, datt d'Kommissioun am Numm vun de 27 EU-Länner Kontrakter mat Impfstoff-Produzente mécht.

EU-Kommissioun gesäit kee Widdersproch

"Mir wëlle Vir-Verträg ofschléissen, déi den EU-Memberlänner d'Recht ginn, eng bestëmmten Zuel vun Impfdosen zu engem bestëmmte Präis ze kafen, esou bal de Vaccin disponibel ass", huet déi zoustänneg EU-Kommissärin Stella Kyriakides e Freideg no enger online-Reunioun vun den EU-Gesondministeren erkläert.

Op där Reunioun hätten d'Ministeren der Kommissioun een entspriechend Mandat gi fir an hirem Numm mat Entreprisen ze verhandelen.

D'Kommissioun proposéiert, 2,7 Milliarden Euro aus der EU-Keess ze huelen, fir Avancen op eventuell Commanden ze bezuelen. Gespréicher wiere schonn amgaang, seet d'Kommissärin.

Wéi passt dat bei d'Initiativ vun deene véier, déi elo no virgeprescht sinn an net op eng europäesch Initiative waarde wollten?

Eemol méi weist sech, datt Bréissel am Gesondheetsberäich, an deem d'Kompetenzen op nationalem Niveau leien, net allze vill Spillraum huet.

Also probéiert een, Eenzelinitiativen an EU-Projeten ënner een Hutt ze kréien. "Mir hunn eis mat deene véier Länner ausgetosch, mir schaffen enk zesummen".

Lëtzebuerg fir EU-Approche

De Jens Spahn betount iwwerdeems, datt hir Initiativ am allgemengen Interêt gestart gouf, an datt de But ass, den Impfstoff fir all 27 EU-Länner ze sécheren.

D'Propos vun der Kommissioun an déi national Initiative si komplementar, sot och e Méindeg de Spriecher vun der Kommissioun, den Eric Mamer.

Dat gesäit net jiddereen esou. Fir déi belsch Gesondheetsministerin Maggy de Block hunn déi véier Länner duerch hiren Accord hir eege Positioun an och déi vun der Kommissioun geschwächt.

Och Lëtzebuerg reagéiert éischter skeptesch. Et wier ee vun där Initiativ iwwerrascht ginn, heescht et aus dem Gesondheetsministère. D'Konditioune vun deem Accord wieren net kloer, an et hätt een dozou Froen un d'Kommissioun gestallt, ouni bis elo eng Äntwert ze kréien. Lëtzebuerg wier éischter fir eng europäesch Approche.

Den Accord mat Astra-Zeneca gëtt jo Aussiicht op bis zu 400 Milliounen Dosen Impfstoff. Dat geet knapps duer fir déi 500 Milliounen EU-Bierger.

D'Fro, wat geschitt, wann et um Enn, bei egal wéi engem Accord, manner Impfstoff gëtt, wéi es déi 27 EU-Länner brauchen, gouf bis elo evitéiert.

An der Mediathéik:

Europa Aktuell / / Danièle Weber
Lauschteren

Méi zum Thema

Prof. Dr. Friedrich Mühlschlegel Direkter vum Staatslabbo
Coronavirus

Den Direkter vum Staatslabo LNS Friedrich Mühlschlegel fënnt et net falsch, datt hei zu Lëtzebuerg net breet op de Coronavirus getest gëtt. D'Testcapacitéiten am LNS géifen awer weider ausgebaut ginn.

Impfen
Medezin

Fir dës Grippesaison huet Lëtzebuerg 77.500 Dosisse Vaccin geliwwert kritt, esou den Direkter vun der Santé. Et géif keng Rupture de stock ginn, phaseweis goufen et awer wuel e puer Enkpäss.

Riedelen
Gesondheet

D'Riedele sinn eng vun den ustiechendste Krankheeten op der Welt. Virun allem déi Erwuesse si responsabel fir d'Verbreedung vum Virus, seet de Dr. Pierre Weicherding vun der Inspection Sanitaire am 100,7 Interview.

Impfen
Gesondheet

Aktuell gëtt et aacht Fäll vu Riedelen zu Lëtzebuerg, seet d'Direktioun vun der Santé. Et wier ze fréi déi Chifferen als Urgence ze deiten, seet den Direkter Jean-Claude Schmit.

 

Net verpassen

Programm

  • Notturno

  • On air

    Virum Dag vu 6 bis 10

  • Panorama

  • Virum Dag vu 6 bis 10

  • Noriichten

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen