GRÉNG INVESTITIOUNEN EU-Kommissioun: Grénge Label fir Gas an Atom

D'Europäesch Kommissioun huet Wëlles Atomkraaft a Energie aus Gas als "nohalteg" anzestufen. Si stellt sech domat hannert d'Fuerderung vu Frankräich a vu verschiddenen osteuropäeschen Länner. Lëtzebuerg hat sech zesumme mat Éisträichesch an Däitschland dergéint ausgeschwat.

Danièle Weber / cz

Atomkraaftwierk
Foto: dpa / Julian Stratenschulte

Lauschteren

Op deen Text war laang gewaart ginn, e sollt nach 2021 virleien, an d'Europäesch Kommissioun huet e schliisslech op Silvester kuerz vru Mëtternuecht per Email verschéckt.

Last-Minute-Email an der Silvesternuecht

Et wollt ee wuel déi méi roueg Feierdeeg ausnotzen, an der Hoffnung, datt déi ëmstridde Propose da fir manner Opreegung suergt.

D'Taxonomie ass eng Zort Klassement fir nohalteg ekonomesch Aktivitéiten. Schonn am Abrëll hat d'Kommissioun en Text presentéiert, doran awer déi zwee ëmstridden Beräicher Atomkraaft a Gas ewechgelooss. Um EU-Sommet gouf stonnelaang doriwwer gestridden. Verschiddener hu probéiert de Sujet erofzespillen, e géif iwwerbewäert sot den däitsche Kanzler Olaf Scholz:

"Die Taxonomie ist ein kleines Thema in einer ganz großen Frage."

Déi Fro ass duerchaus grouss, well de Klassement an der Taxonomie gëllt net nëmmen als Recommandatioun fir Investisseuren, ma och dofir, wéi eng Aktivitéit eligibel si fir eng Ënnerstëtzung duerch ëffentlech Gelder.

Atomzentralen si klimafrëndlech a nohalteg

Der Kommissioun no wier de Bau an de séchere Betrib vu neien Atomkraaftwierker konform mat der Taxonomie - dat heescht als nohalteg anzestufen. Dat gëllt fir Atomzentralen, déi bis 2045 eng Autorisatioun kruten. Den Offall gëtt net als prinzipiell problematesch ugesinn, sou laang dofir een detailléierte Plang virläit. Och Investitiounen a Atomzentralen déi schonn existéieren, an déi bis 2040 zougelooss ginn, kriten dee grénge Label. Dat nämmlecht gëllt ënner bestëmmte Konditioune fir Gas.

D'Kommissioun kënnt mat hirem Virschlag virun allem Frankräich ma och der tschechescher Republik oder Polen entgéint. Entspriechend positiv falen do d'Reaktiounen aus. Kritik kënnt aus Däitschland, Éisträich a Lëtzebuerg.

Kritiker kéinten an der Minoritéit sinn

D'Proposen (wier prozedural eng Provokatioun) a géif elo zesumme gepréift, schreift de Lëtzebuerger Energieminister Claude Turmes op Twitter.

Méi däitlech dréckt sech d'Leonore Gewessler, éisträichesch Ëmweltministerin aus. Sollt den Text esou bleiwen, wéi en elo virläit, géing hiert Land dogéint vrum Europäesche Gerichtshaff kloen.

"Mir wäerten op jiddwer Fall all Moyenen, déi mer hunn weider benotzen", sou de Premier Xavier Bettel nom EU-Sommet zu Bréissel - och hien hat eng Plainte an Aussiicht gestallt.

Et kéint gutt sinn, datt eng Plainte deen eenzegen Wee ass, sech ze wieren. Well den Text kann zwar vun enger Majoritéit vun de Memberlänner an am Europaparlament refuséiert ginn - op béide Säiten ass awer net domat ze rechnen, datt d'Géigner genuch Stëmmen zesumme kréien.

Méi zum Thema

Danièle Weber
CHRONIK

An der EU ginn et Diskussiounen doriwwer, ob Gas an Atomkraaft als "gréng" agestuuft solle ginn. D'Decisioun wäert wuel éischter politesch sinn. Lëtzebuerg huet hei net ëmmer eng eendeiteg Positioun gehat, mengt d'Danièle Weber.

Illustratioun fifty shades of green
GRÉNG FINANZEN

Hu Gas oder Atomkraaft de Label "nohalteg" verdéngt? Op kee Fall, seet den Energieminister. De Finanzminister ka sech eng méi grouss Faarf-Palette bei deem Klassement virstellen. An der EU gëtt hefteg doriwwer diskutéiert.

Programm

Dossieren

  • Chamberwalen 2023

    Den 8. Oktober gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

  • Gemengewalen 2023

    Den 11. Juni gëtt an de verschiddene Gemenge vum Land en neie Gemengerot gewielt. Wéi eng Sujete dominéieren d'Wal a wéi verleeft de Walkampf an de vereenzelte Gemengen?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen