Kaarten op den Dësch État de la na...ture

Biodiversitéit: D'Liewensraim si schlecht drun

Punkto Biodiversitéit weist d'Doris Bauer, déi beim Gemengesyndikat SIAS fir Naturschutz zoustänneg ass, drop hin, datt 70 Prozent vun eise Liewensraim schlecht dru wieren. Och iwwer 60 Prozent vun den Aarte wieren an engem ganz schlechten Erhalungszoustand, esou d'Doris Bauer.

Schold um Biodiversitéitsverloscht wier, an der Haaptsaach, déi extensiv Landwirtschaft, zu där d'Baueren an de leschte Jorzéngten encouragéiert gi sinn, esou de Jacques Pir vum Mouvement écologique.

Fir déi Aarten ze erhalen, déi et zu Lëtzebuerg gëtt, seet de Jaques Pir, et misst een 30 Prozent vum Gréngland a 25 Prozent vum Akerland Natur-no bewirtschaften. Dat geet net ouni radikaalt Ëmdenken an der Agrarpolitik.

Et géif een encourageant Biller gesi vu positive Resultater, wann Efforten a Moyenen op de richtege Plazen agesat ginn, esou de Jacques Pir. An trotzdeem géifen, a sengen Aen, net déi richteg Weiche gestallt ginn:

" [...] wat mir am Moment maachen, dat geet net emol duer fir e Status quo ze erhalen. Dat heescht mir si leider nach ëmmer am fräie Fall. An dat ass eben dat, wat e bësse méi pessimistesch ass, dat - an eisen Aen zumindest - net déi richteg Weiche gestallt gi fir do e Revirement hinzekréien."

Positiv Resultater beim Waasser

Datt déifgräifend Décisioune sech lounen, géif d'Beispill Waasser weisen, seet de Luc Zwank vun der Waasserverwaltung.

Héi géif ee Resultater gesinn, wann een déi Richteg Kaart an der richteger Reiefolg spillt, esou de den Directeur adjoint vun der Waasserverwaltung.

Dëst kéint een, zum Beispill, bei manner staarker Nitrat- oder Pestizidbelaaschtung vum Grondwaasser an de Quelleschutzzone gesinn.

De Bësch: "unkapputbar"

A wéi geet et dem Bësch? De Marc Parris, pensionéierte Fierschter, mécht sech wéineg Suergen a seet, de Bësch wier eigentlech "unkaputtbar".

Kloer wär awer och: e wäert sech änneren. De Bësch vun haut ass anescht wéi dee vu gëschter.

An deem Kontext seet de Marc Parris, datt de Bësch muer och anescht wäert sinn, an hie géif un déi natierlech Dynamik vum Bësch gleewen.