Digitaliséierung vun der Aarbechtswelt "Et ass keen Enn vun der Aarbecht a Siicht"

D'Rifkin Etude wier wichteg am Prozess vum digitale Wandel zu Lëtzebuerg. Dat seet de Franz Clément, Soziolog a Chercheur beim LISER. Zanter e puer Joer géif jiddwereen iwwer d'Digitaliséierung schwätzen an doriwwer, wéi de séiere Wandel sech op d'Aarbechtswelt auswierkt.

D'Gesellschaft huet sech nach ëmmer missten upassen

D'Gesellschaft hätt sech schonn ëmmer missten upassen, erkläert de Franz Clément unhand vun engem konkrete Beispill. Am 16. Joerhonnert hätt de William Lee an England eng Bitzmaschinn erfonnt. Deemools hätt een déi kinneklech Erlaabnis gebraucht fir seng Erfindung ze verkafen, a sou huet hien déi deemoleg Kinnigin Elisabeth ëm eng Autorisatioun gefrot. Si hätt him awer gesot, datt si seng Erfindung zwar interessant géif fannen, mee si wollt et him net erlaben, se ze kommerzialiséieren, well dann d'Néieschen uechter d'Land keng Aarbecht méi hätten.

Déi selwecht Reflektioun géif een haut, fënnef Joerhonnert méi spéit, nach ëmmer an der Gesellschaft erëmfannen. Et hätt een nach ëmmer Angscht, d'Enn vun der Aarbecht ze erreechen. Dëst wier awer nach ëmmer net geschitt, an d'Aarbecht wier och nach ni ganz ofgeschloss gewiescht.

Educatioun un d'Evolutioun upassen

Et ass de séiere Rhythmus vum technologesche Wandel, dee ville Leit haut Angscht mécht, esou de Franz Clément. En Ëmdenken a permanent Formatioune wiere wichteg fir d'Aarbechtswelt un déi digital Evolutioun unzepassen.

De Soziolog seet, datt d'Aarbecht vum Educatiounsminister dofir extrem schwiereg wier, an dat op der ganzer Welt, well een déi gesellschaftlech Ausbildung misst un de Fortschrëtt upassen, an deelweis Formatioune fir Beruffer ubidden, déi et zum Deel nach net ginn. Verschidde Studien, déi an den USA gemaach goufen, géife virausgesinn, datt mir an 20 bis 25 Joer mat Beruffer konfrontéiert sinn, déi mIr haut mol nach net kennen.