Gemengewahlen "Et ass Asbest fonnt ginn"

Eréischt gëschter ass am Gebai Asbest fonnt ginn. "Mir mussen elo de Rapport ofwaarden", sou den Yves Wengler, "da wësse mer, wéini kann ofgerappt ginn." De Buergermeeschter wëll awer sou séier wéi méiglech d'Saach iwwert Bühn bréngen. "Et wär flott gewiescht, wann dat virun de Wahle geschitt wier. D'Iechternacher Bierger sinn no 21 Joer mësstrauesch ginn."

Et wier wichteg, datt de Gemengerot sech iwwerhaapt fir e Kaf vum Gebai decidéiert hätt, sot de grénge Gemengeconseiller Raymond Becker. "Fir Iechternach ass dat, wéi de Phoenix aus den Äschen." Et wier dofir och net sou schlëmm, op elo am September oder eréischt méi spéit tatsächlech ofgerappt gëtt. "De Problem "Marquise" ass sou gutt wéi geléist."

Zukunft ass "slow tourism"

Och wann et dem Tourismus zu Iechternach gutt geet, hätt d'Hotelsbranche an der Gemeng awer e Problem. Fir den Yves Wengler läit de Problem doranner, datt vill Familljebetriber net weidergefouert ginn. "D'Gemeng kann net vill entgéintsteieren. Dat ass eng Saach vu Subsiden."

De Raymond Becker ass iwwerdeems der Meenung, datt Iechternach eng ganz gutt Ausgangspositioun huet, wat den zukünftegen Tourismus ugeet. "Wat ass den Tourismus vu muer? D'Leit wëlle Kultur a Soziales erliewen. Et ass net méi: ëmmer méi wäit, ëmmer méi héich. D'Leit wëlle méi buedemstänneg ginn." De Gemengerot hätt finanziell säin Deel dozou bäigedroen, fir Konzepter wéi "slow tourism" z'erméiglechen.

"Etude ginn net duer"

Net zefridden ass de Gemengeconseiller vun déi gréng awer mat der Roll vun der Gemeng am Klimapakt - obwuel Iechternach fir seng Aarbecht an der Energie- an Ëmweltschutzpolitik zertifiéiert ginn ass. Et géif net duergoen, just Etuden ze maachen a Prozentzuelen z'erreechen. "Zu Iechternach ass et laang verschleeft ginn, iwwerhaapt an deem Klimapakt serieux unzefänken." Et misst een awer och d'Leit mat konkreten Aktioune begeeschteren, zum Beispill mat engem Veloskonzept fir Iechternach.

"Et ass net sou, datt näischt gemaach gëtt", reagéiert den Yves Wengler op déi Kritik. "Mä et ass effektiv esou, datt et e bësse geschleeft huet. Et ass esou, datt wann een als Politiker net hannendrun ass, da geet et och net virun."

Zil: Fra am Gemengerot

Bei de Gemengewahlen wëll den CSV-Buergermeeschter iwwerdeems Beschtgewielte ginn. De Marc Diederich, deen 2011 Beschtgewielten op der CSV-Lescht war, geet och dësen Hierscht nees mat an d'Wahlen. "Wann ech net als Beschtgewielten erauskommen, dann hu mir e Problem. Dann hunn ech wahrscheinlech och eppes falsch gemaach."

déi gréng mussen dëst Joer ouni hir Beschtgewielte vun 2011 - déi aktuell Ëmweltministerin Carole Dieschbourg - untrieden. "Si war natierlech eng ganz staark Kandidatin, an déi eenzeg Fra am Gemengerot." Dofir hätt een en Effort gemaach, fir op deem Plang nozezéien, sou de Raymond Becker. Sechs vun den 11 Kandidaten op der Lëscht vun déi gréng zu Iechternach si Fraen.