Trennung Kierch a Staat Eskalatioun am Konflikt ëm Zukunft vu Kierchefabricken
De Sträit tëscht dem Daachverband vun de Kierchefabricken an der Regierung ëm d'Proprietéite vun der Kierch spëtzt sech zou. De Marc Linden, Vizepresident vum Syfel, dreet der Regierung mat Prozesser.
Sollt sech weisen, datt d’Regierung hire Gesetzprojet iwwert de Kierchefong duerchgebaatscht huet, da wäerten Expropriatiounsprozesser op d'Regierung duerkommen, sou de Marc Linden, Vize-President vum Syfel e Mëttwoch de Moien um radio 100,7. Doriwwer eraus géing den Daachverband vun de Kierchefabricken eng Plainte um Europäesche Geriichtshaff fir Mënscherechter zu Stroossbuerg envisagéieren, wéinst Amëschung vum Staat an d'Reliounsfräiheet.
Wann de Bistum sech op d'Säit vum Syfel géing stellen, da kéint den Daachverband vun de Kierchefabricken d'Plaintë géint den Äerzbëschof an de Generalvikar faleloossen.
Kierchefabricke si juristesch Entitéiten a lokal Proprietairen a Gestionnairë vun Immobilië vun der kathoulescher Kierch. Am Kader vun der Trennung vu Kierch a Staat, an der Konventioun tëscht Regierung a Bistum, sollen déi juristesch Entitéiten opgeléist ginn an an e Fong vun der Kierch fléissen. De Syfel, de Verband vun de Kierchefabricke wëll dat net, an huet, no vill Sträit mam Bistum rezent en Accord mat deem fonnt, wéi d'Kierchefabricken an Zukunft erhale kënne bleiwen. Domadder géing awer d'Konventioun tëscht der Regierung an dem Bistum a Fro gestallt ginn.
Fir den Inneminister ass dat ausgeschloss. Enger Propos vum Dan Kersch no dierfte sech d'Kierchefabricken zwar lokal organiséieren, mee als Ënnerorganisatioun vun engem Kierchefong. De Syfel lehnt dat of.
Am Regierungsrot wëll den Inneminister Dan Kersch um Mëttwoch Amendementer presentéieren zum Gesetzprojet iwwert d'Schafung vum Kierchefong.
Interview mam Invité vu Dag Marc Linden
Op senger Generalversammlung en Dënschdeg huet de Syfel säin Accord mam Bistum iwwert d'Gestioun vun den Immobilie vun de Kierchefabricke verdeedegt
Méi zum Thema
Riicht Eraus
Dan Kersch refuséiert Virschlag vu Bistum a Syfel
Den Inneminister ass am Sträit ëm d'Zukunft vun de Kierchefabricken net averstane mam Virschlag vum Bistum a vum Syfel. Hien huet e Géigevirschlag gemaach - a wënscht sech bis de Méindeg eng Äntwert.
Dan Kersch: Kierchefabricke mussen ofgeschaaft ginn
Et gëtt eng grondsätzlech Eenegung tëscht dem Bistum an dem Daachverband vun de Kierchefabricken. Dem Inneminister no wier et net acceptabel, wa géif probéiert ginn, d'Kierchefabricken z'erhalen.
Syfel hëlt Bëschof a Ministeren op d'Geriicht
De Sträit bannent der Kierch spëtzt sech zou. Den Äerzbëschof refuséiert, d'Konventioun iwwert d'Basilika z'ënnerschreiwen, wéinst enger Klo vu Kierchefabricken an hirem Daachverband.
“Fir eis sinn d’Proprietéitsverhältnisser kloer”
Mat zwielef Kierchefabricken ass sech d’Gemeng Lëtzebuerg eens ginn. Mee och déi aner missten akzeptéieren, datt déi meeschte Kierchegebaier der Gemeng gehéieren, sou d'Buergermeeschtesch Lydie Polfer.
