Restriktiounen Epidemiolog: "Couvre-feu ab 18 Auer a Schoulen zou"

Soulaang d'Zuel vun Neiinfektioune pro 100.000 Awunner pro Woch net ënner 50 fält, wier de Virus net an de Grëff ze kréien. Dann eréischt kéint de Contact-Tracing iwwerhaapt gräifen.

"All Neiinfektioun léisst eng kleng Lawin aus"

Fir de Mikrobiolog an Epidemiolog Michel Pletschette mussen déi aktuell Restriktiounen dofir onbedéngt verlängert a vläicht esouguer verschäerft ginn:

​"Virdrénglech ass et, d'Schoulen zouzehalen. Manifestement ass dat e Punkt, deen an England komplett negligéiert ginn ass, wou et elo Donnéeë ginn, datt dat awer terribel war. (...) [Et] muss doriwwer nogeduecht ginn, de Couvre-feu ze verlängeren."

Hie schléit ee Couvre-feu vun 18 Auer vir. De Lëtzebuerger, deen op der Uni München fuerscht an enseignéiert, fënnt et bedauerlech, datt d'EU-Länner hir Restriktiounen net openeen ofgestëmmt hunn.

Problem beim Impfstoff läit bei der Industrie

D'Kriticken un der EU-Kommissioun, si hätt et verschlof genuch Impfstoff anzekafen, hält de Michel Pletschette iwwerdeems fir net gerechtfertegt.

Et wieren zwou Milliarden Dosisse bestallt ginn, also méi wéi der gebraucht ginn:

"Et ass de Problem vun der Industrie, déi net produzéieren an net liwwere kann, an déi warscheinlech och eng Rei vu Saachen ënnerschat huet. BioNTech muss jo elo eng nei Fabrick opmaachen zu Marbuerg, fir dann am zweete Quartal déi Bestellunge kënnen ze bedéngen."

Dat hätt een natierlech kënne virdru wëssen, esou de Michel Pletschette, "mee dat ass de Problem vun deem Vertrauen, dat een de Firmae gëtt oder muss ginn an de Mangel un enger ëffentlecher Alternativ."