Staatsvisite a Japan Eng erfollegräich Wirtschaftsmissioun
D'Delegéiert, déi de Grand-Duc a Japan begleet hunn, sinn zefridden. Nieft dem Accord am Beräich vun de Space Resources koum ee sech och op anere Punkte méi no. Och am audiovisuelle Secteur.
Dräi Deeg laang huet d'Staatsvisite vum Grand Duc a vun der Prinzessin Alexandra a Japan gedauert. E Mëttwoch den Owend ass den offiziellen Deel op en Enn gaangen. Déi 100-käppeg Wirtschaftsdelegatioun, déi de Groussherzog begleet huet, weist sech zefridden. Virun allem wéinst engem Accord am Beräich vun de Space Resources, dee Lëtzebuerg a Japan ënnerschriwwen hunn.
Als gréissere Succès hieft de Finanzminister Pierre Gramegna de Kooperatiounsaccord tëscht der Cargolux an Nippon Cargo Airlines ervir. Zënter 30 Joer war den Accord an der Diskussioun, an e Mëttwoch gouf en ënnerschriwwen. Domat kréich d'Lëtzebuerger Cargo-Gesellschaft ënnert anerem Accès op de Flughafen Narita.
Déi direkt Verbindung géif zu méi Exporter an Importer féieren, sou de Pierre Gramagna: "Domat symboliséiere mir och, datt Lëtzebuerg wéi Japan Länner sinn, déi oppe si fir de Commerce mondial."
Medikamenter a Filmer
An noer Zukunft kéint e gréissere japanesche Pharmakonzern sech zu Lëtzebuerg installéieren a Pharmazeutika produzéieren, sot de Wirtschaftsminister Etienne Schneider. Weider Informatioune wollt hien awer nach net nennen.
Och am kulturelle Beräich sinn iwwert déi lescht Deeg Gespréicher mat japanesche Betriber zu Tokio gefouert ginn. Besonnesch am audiovisuelle Beräich bestéing Interessi fir eng Zesummenaarbecht, sou den Etienne Schneider. Beim Tokyo International Filmfestival wier Gutland vum Lëtzebuerger Realisateur Govinda van Maele selektionéiert ginn. "Och do hu mir e Succès ze vermellen. Produktioune vu Lëtzebuerg sinn hei unerkannt a sinn och positiv opgefall. A mir hoffen dat kënne weider auszebauen."
Partner fir d'industriell Revolutioun?
Japan wier och interessant als Partner fir Lëtzebuerg, well immens vill Prozesser robotiséiert gi wieren, seet de Generaldirekter vun der Chambre de Commerce, Carlo Thelen. Well d'Land konfrontéiert wier mat engem Mangel u Personal, wieren aner Léisunge gesicht ginn, iwwert de Wee vun der Technologie. Lëtzebuerg misst och Ressourcen importéieren, well et der net genuch hätt. Lëtzebuerg a Japan kéinte bei hire Strategië fir d'Entwécklung vun der Gesellschaft zesummeschaffen a vunenee léieren.
D'Delegéiert schwätze vun enger ganz erfollegräicher Wirtschaftsmissioun. Vill Gespréicher wieren nach am gaangen a géifen zum Deel an den nächsten Deeg ofgeschloss ginn. Den offiziellen Deel ass elo eriwwer. Um Donneschdeg reest de Grand-Duc nees zréck op Lëtzebuerg.
Bäitrag vum Paule Rodesch vum 30. November:
Méi zum Thema
Lëtzebuerg a Japan kollaboréieren am Weltraum
Bei der Staatsvisite a Japan gouf en Accord fir eng Kooperatioun am Weltraum-Secteur ënnerschriwwen. Och d'Japan Aerospace Exploration Agency stellt sech als interessante Partner fir Lëtzebuerg duer.
Litauen a Lëtzebuerg verdéiwen hir Relatiounen
De Grand-Duché a Litauen wëllen um wirtschaftleche Plang an a Sécherheetsfroe méi enk zesummeschaffen. Déi offiziell Visite vum Grand-Duc a Litauen huet gewisen, datt et vill Potential gëtt.
EU gëtt sech anti-protektionistesch
D'EU gëtt sech iwwert ee Fräihandelsaccord mat Japan eens a schéckt ee klore Message géint de Protektionismus op de G20-Sommet. D'EU wier mat deem Message net kredibel, seet Greenpeace.
Empfang "op héchstem Niveau"
De Xavier Bettel ass op offizieller Visite a China. Et goufen eng Rei Accorden an Absichtserklärungen ënnerschriwwen. Donieft stounge Gespréicher mat de Vertrieder vun chinesesche Banken um Programm.
