No den Iwwerschwemmungen Eng besser Kommunikatioun bei Katastrophen
D'Regierung zitt hir Konsequenzen aus der Iwwerschwemmungskatastroph. Virun allem an der Kommunikatioun sollen et Verbesserunge ginn. Dat äntwert d'Inneministerin Taina Bofferding op eng parlamentaresch Fro vum Piraten-Deputéierte Sven Clement.
D'Ministerin verweist an hirer Äntwert op en interministeriellen Aarbechtsgrupp, dee scho virun der Katastroph domadder beoptraagt gi war, de System vu GouvAlert ze iwwerschaffen.
Et geet dobäi souwuel ëm d'App selwer, wéi och ëm digital Alternativen. Déi Reform soll an Zesummenaarbecht mam Centre des Technologies de l'État (CTIE) bis Mëtt 2022 fäerdeg gestallt sinn.
Kloer wier awer, dat d'Populatioun zukünfteg iwwer méi Kanäl wéi bis elo informéiert gëtt, dozou gehéieren Internetsitten an Appen, mee och déi klassesch elektronesch Medie wéi Radio an Tëlee, souwéi déi sozial Medien.
Mat Cell Broadcast solle méi Leit erreecht ginn
Dobäi kënnt déi iwwerschaffte GouvAlert-App a virun allem en SMS-System op Basis vum sougenannte Cell Broadcast.
Dee System erlaabt et sämtlechen Handyen an enger gewësser Regioun eng Push-SMS ze schécken a se esou ze warnen. Déi Concernéiert brauchen dobäi näischt erofzelueden a sech néierens unzemellen, domadder gëtt och d'Couverture vill méi grouss wéi bei enger App.
Der Inneministerin no wëllt Lëtzebuerg och an déi Richtung goen an de Schwéierpunkt op eng multikanal Warnung leen.
Den Haut Commissaire à la Protection Nationale (HCNP) Luc Feller huet der Regierung eng Nott zoukomme gelooss, dat no Gespréicher mat de betraffenen Administratiounen. Dës Nott wäert eisen Informatiounen no haut dem Ministerrot presentéiert ginn.
Méi zum Thema
Héichwaasser: D'Gemenge wëllen e bessere Warnsystem
De President vum Syvicol fuerdert, datt Léieren aus dem Héichwaasser gezu ginn. Et misst ee bessere System fonnt gi fir d'Leit fréizäiteg ze warnen, wann d'Waasser klëmmt, esou den Emile Eicher.
Héichwaasser: "Mir mussen d'Kommunikatioun kritesch iwwerdenken"
Den Direkter vum Waasserwirtschaftsamt wëllt d'Aart a Weis wéi virun Héichwaasser gewarnt gëtt "kritesch iwwerdenken". Bis elo hätt een d'Populatioun haaptsächlech iwwer inondations.lu gewarnt - an Zukunft misst een awer méi op d'soziale Medie setzen.
D'Leit bei enger Katastroph besser informéieren
Fir d'Bevëlkerung am Fall vun enger Naturkatastroph méi séier ze informéieren, schafft am Inneministère en Aarbechtsgrupp un enger Léisung. Et wéilt een ewech vun der GouvAlert-App, seet d'Taina Bofferding.
CGDIS: Warnsystem an Austausch verbesseren
Den Direkter vun den Operatioune vum CGDIS wëllt den Echange mat de Gemenge verbesseren. Den Tom Barnig betount awer, datt déi Zesummenaarbecht op lokalem Niveau an de meeschte Fäll gutt geklappt hätt.
