Yuriko Backes Ëmsetze vum Waringo-Rapport "primordial a prioritär"
D'Ëmsetze vum Waringo-Rapport wier fir d'Yuriko Backes "primordial a prioritär", deelt den Haff eis mat. Si géif "op eng intensiv Aart a Weis" zesumme mam Grand-Duc a mat der Regierung, respektiv mam Staatsministère, "Hand an Hand" schaffen, fir de Reformprozess "esou séier wéi méiglech duerchzezéien".
D'Yuriko Backes, zanter dem 1. Juni déi nei Maréchale de la Cour, wëllt dem radio 100,7 keen Interview zur aktueller Situatioun um Haff ginn a géif Detailer iwwer Personaldossiere vum Haff och net kommentéieren.
Schrëftlech deelt den Haff op Nofro hi mat, datt de Michel Heintz nach Chef de Cabinet vum Grand-Duc wier. Sollt et zu personellen Ännerunge kommen, géif den Haff dat matdeelen.
Wéi den Onlinemagasinn reporter.lu gëschter gemellt huet, a mir et confirméiert kruten, huet den Haff Enn Mee de Chef de Cabinet vum Grand-Duc entlooss. Eréischt no enger Interventioun vum Premier Xavier Bettel wier d'Kënnegung zeréckgezu ginn.
Méi zum Thema
Spannungen um groussherzoglechen Haff gi virun
Den Albert Wildgen, de laangjärege President vun der Administration des Biens vum Grand-Duc huet no 12 Joer demissionnéiert. Dat huet den Haff an zwee Sätz matgedeelt. Den Norbert Becker iwwerhëlt déi Plaz.
Relatioun tëschent Haff a Staatsministère nees ugespaant
De Premier Xavier Bettel huet duerch eng Interventioun beim Haff d'Entloossung vum Cabinetschef vum Grand-Duc bis op Weideres erëm réckgängeg gemaach. Déi Nouvelle vu Reporter.lu krut den 100komma7 vu gutt informéierte Sourcë confirméiert.
"Mir kënnen eis keen zweete Waringo-Rapport erlaben"
Et wier am Interêt vu jiddwerengem - och vum Haff - datt Reegelen opgestallt ginn an datt sech dann och doru gehale gëtt, seet de Xavier Bettel. Hie wéilt der Monarchie nämlech net schueden, am Géigendeel.
Gros vu Recommandatioune gëtt an nächster Zäit ëmgesat
Ronn 90 Prozent vun de Recommandatioune vum Jeannot Waringo a sengem Rapport iwwer de groussherzoglechen Haff solle mam Accord vum Grand-Duc an nächster Zäit ëmgesat ginn, huet de Xavier Bettel ugekënnegt.
