Spidolswiesen ënner Drock Emile Bock: "Mir sinn net gutt genuch opgestallt"
Wat d'Behandlung vu Covid-Patienten ubelaangt, wier an der éischter Well vill geléiert ginn, seet den Dokter Emile Bock. Den Urgentiste aus den Hôpitaux Robert Schuman kritiséiert awer, datt aus der chronescher Ënnerbesetzung vun de Spideeler net déi richteg Lektioune gezu gi wieren.
Den Urgentiste fäert dofir, datt de Gesondheetssystem an den nächste Wochen u seng Limitte stousse kéint. Also net well et (wéi am Fréijoer nach) un eenzelen Ekipementer feelt, mee éischter um Personal, dat domat ëmgoe kann, esou den Dokter Emile Bock."Dir kënnt 300 Apparaten hunn, wann der net Leit mat den néidege Qualifikatiounen hutt fir déi ze bedéngen, dann hëlleft dat net vill", esou den Dokter.
Et géifen aktuell och Ekippen ausfalen, wat immens beonrouegend wier. "Do si Spideeler befall, do hu ganz Stäck missen zougemaach ginn." A senger Ekipp hätt den Emile Bock eleng gëschter een Dokter an dräi Infirmièren, déi ausgefall sinn, déi remplacéiert musse ginn. An anescht wéi bei der éischter Well, wou e komplette Lockdown decidéiert gi war, "wësse mer, datt dat hei e Marathon gëtt".
De Fait, datt programméiert Operatiounen a programméiert Medezin misst erofgefuer ginn, fir d'Corona-Kris ze bewältegen, gesäit den Dokter als e weideren Indice dofir, "datt mer net gutt genuch opgestallt sinn".
"Et ass gesot ginn am Summer, datt mer net méi wéilten déi normal Medezin eroffueren an awer d'Corona-Patiente an engems betreien, dat ass eppes, an där Situatioun si mer elo net méi."
An e puer Woche méiglecherweis 400 hospitaliséiert Covid-Patienten
Den Urgentiste Emile Bock geet vun der Méiglechkeet aus, datt een an e puer Wochen ëm 400 hospitaliséiert Covid-Patienten ze versuergen hätt. Déi rezent nees méi héich Infektiounszuelen wäerte sech eréischt an e puer Deeg an der Statistik vun den Hospitalisatiounen nidderschloen. Déi Berechnunge kéint ee maachen, wann ee sech déi aktuell Infektiounszuelen ukuckt, esou den Dokter aus den Hôpitaux Robert Schuman. E wichtegen Ënnerscheed vun haut géigeniwwer Mäerz ass och, datt haut just nach déi "richteg krank Patienten", dat heescht, déi Sauerstoff brauchen, hospitaliséiert géife ginn, an d'Zuele vun den Admissioune klamme weider.
"Et brauch ee just d'Fallzuele vun all Dag ze kucken, an dann huelt der grosso modo zéng Prozent, da wësst der, wéi vill Leit an d'Spidol kommen.
An der Mediathéik:
LauschterenMéi zum Thema
"Perfektioun gëtt et am Kampf géint dee Virus net"
An der Chamber herrscht kee Konsens, wéi d'Corona-Infektiounszuelen am Beschten nees kënne reduzéiert ginn. De Mars Di Bartolomeo hofft, datt d'Chamber déi nei Corona-Mesurë séier ka stëmmen - trotz ville Kritikpunkte vun der Oppositioun.
Gesondheetsministerin: Keng Evenementer vu méi wéi 100 Leit
Rassemblementer mat méi wéi 100 Leit wieren op Grond vun der aktueller Situatioun net méi erlaabt, esou d'Paulette Lenert. Och an engem eenzele Restaurant dierfen nëmmen nach maximal 100 Gäscht matenee sinn.
Projektioun: Bis zu 1.400 Neiinfektioune den Dag
Ouni ee "gesellschaftlechen Effort" géifen d'Fallzuele bis Mëtt November staark klammen, prognostizéiert d'Covid-19-Task-Force. Da stéing dem Gesondheetssystem am Dezember eng schwéier Kris bevir.
Lëtzebuerger Spideeler: Sich no Personal gëtt ëmmer méi schwéier
Déi nei Well u Coronavirus-Infektioune setzt Lëtzebuerg ënner Drock fir séier neit Gesondheetspersonal ze rekrutéieren. De Konkurrenzkampf mat aneren europäesche Länner spëtzt sech doduerch zou. Net nëmmen an der Nopeschregioun.
