Franséisch Atomindustrie E Spill mam Feier

Lauschteren

Et war keen einfacht Joer fir déi franséisch Atomindustrie. Souguer wann een net prinzipiell géint Atomkraaft ass, et ginn zolidd Argumenter dergéint: si verhënnert den Ausbau vu alternativen Energiequelle wou grad Frankräich en enormt Potential huet, nei Anlagen si praktesch net ze bezuelen, an et gëtt keng Léisung fir den Offall.

Gréisser Suergen

Dobäi kommen eng Hellewull un aktuelle Problemer: De Prestigeprojet EPR zu Flamanville huet iwwer zéng Joer Retard an d'Käschte si mat bis elo 13,2 Milliarden Euro komplett aus dem Rudder gelaf. De Konzern EDF huet misse verstaatlecht gi fir en virun der Quasi-Faillite ze retten.

D'Disponibilitéit vun de franséischen Zentrale louch leschte Summer op engem Rekorddéif. Ze wéineg Killwaasser wéinst der Rekordhëtzt an Entretiensaarbechte wéinst Rëss hunn d'Produktioun gestoppt.

Och am Reakter Nummer 3 zu Cattenom gouf virun enger Woch elo een neie Rass am Sécherheetssystem entdeckt. Déi Lëtzebuerger Regierung huet wéinst dësen neie Rëss ee Bréif un déi zoustänneg franséisch Ministèrë geschéckt an ëm Informatioune gefrot.

Ma am Bréif vun der Lëtzebuerger Regierung, deen eis virläit, gëtt eng weider Suerg formuléiert: Mam Gesetzesprojet, mat deem den Ausbau vun der Atomkraaft a Frankräich méi séier viru goe soll, ginn déi zwou wichtegst Kontrollinstanzen zesumme geluecht. Den Institut de radioprotection et de sûreté nucléaire IRSN, en établissement public fir Expertise a Fuerschung, soll an Zukunft mat der Autorité de sûreté nucléaire ASN zesumme geluecht ginn.

Den demokratesche Prozess a Fro gestallt

Eng Decisioun, déi komplett onerwaart an hanner zouenen Diere gefall ass, soen d'Kritiker. Et ass fir déi éischte Kéier iwwerhaapt, datt a Frankräich Gewerkschaften, Ethikkommissioun, conseil scientifique a Politiker vu verschiddene Borden sech entsat weisen. An dat onofhängeg dovunner, ob si pro- oder antinucléaire sinn. Virop well den demokratesche Prozess net respektéiert gouf.

D'Trennung vun deenen zwou Kompetenze wier deemno ee Garant dofir gewiescht, datt et a Frankräich bis elo net zu engem gréisseren Atomtëschefall koum. Déi franséisch Regierung schwätzt vu "fludifier le fonctionnement". Wat dat an der Praxis heescht dierft kloer sinn: fir d'Erneiere vum alen Atompark ze forcéieren, ginn déi Stëmme blockéiert, déi duerch hir kritesch Expertis riskéieren, Projeten ze bremsen. A wann herno dee selwechten Techniker, deen d'Risiken evaluéiert, och soll decidéieren, ob eng Zentral aus Sécherheetsgrënn ofgeschalt gëtt oder net, da kënnt ee séier an en Interessekonflikt. Wéi ëmmer een zur Atomkraaft prinzipiell steet, Frankräich spillt mat dëser Decisioun mam Feier.