BREXIT "Dialog, mä keng Verhandlung"
De britesche Brexit-Minister David Davis war op Aarbechtsvisite zu Lëtzebuerg - déi éischt Statioun vu senger Tournée duerch déi 27 EU Länner, nom prinzipiellen Trennungsaccord vum Dezember zejoert. Den David Davis huet den Ausseminister Jean Asselborn an de Finanzminister Pierre Gramegna gesinn. Et wier en oppenen Dialog gewiescht, sot eis de Jean Asselborn.
Den Accord vum Dezember 2017 iwwert den Artikel 50, also déi prinzipiell Trennungsfroen, géif stoen, ma missten elo ëmgesat an an eng juristesch Form bruecht ginn.
Eng Erausfuerderung géif et nach beim Sujet Nordirland ginn, seet de Jean Asselborn. Et sollt keng physesch Grenz ginn, mä eng Differenz. D'Brite géifen drop halen, datt d'Nordiren net am Marché commun vun der EU wäerte sinn.
Der Finanzplaz Rechnung droen
Besonnesch wichteg fir Lëtzebuerg wier et, en Accord ze fannen, deen der Lëtzebuerger Finanzplaz Rechnung dréit. London wier zwar déi gréisste Finanzplaz an der EU, mä déi zu Lëtzebuerg wier awer net onwiesentlech. Dëst misst an de Verhandlunge Rechnung gedroe ginn.
Den Austausch tëscht dem Jean Asselborn an dem David Davis wier awer just en Dialog gewiescht, esou den Ausseminister. Verhandlunge géifen tëscht der Europäescher Unioun a Groussbritannie gefouert ginn.
Méi zum Thema
Méi oder manner Sue fir d'EU?
D'EU diskutéiert iwwert de Budget vun 2020 un. Déi eng wëlle méi ee grousse Budget, déi aner de Contraire. Kloer ass, datt wéinst dem Brexit muss gespuert ginn an datt méi Sue fir grouss Projeten gebraucht ginn.
Brexit: Den Zäitplang gëtt enk
D'Europaparlament ass zefridde mat deem, wat bis elo an de Brexit-Verhandlunge festgehale gouf. D'EU konnt sech duerchsetzen, sou d'Analys vum Parlament. Et bleiwen awer nach vill Detailer ze klären.
