Decisioun vum Verwaltungsgeriicht Deputéiert mussen de ganzen RTL-Konzessiounsvertrag gewise kréien
De Medieminister Xavier Bettel muss den Deputéierte vun der Mediekommissioun an der Chamber de ganze Konzessiounsvertrag vun RTL weisen. Dat huet de Verwaltungsgeriichtshaff den Dënschdeg decidéiert.
De Sven Clement hat Klo um Verwaltungsgeriicht agereecht, nodeems de Xavier Bettel refuséiert hat, de ganze Konzessiounsvertrag an der Kommissioun oppen ze leeën. De Chamberdeputéierte vun der Piratepartei hat dat gefrot, fir kënnen ze kontrolléieren, ob RTL no hirem Restrukturéierungsplang 2019 nach d'Konditioune géif erfëllen, déi am Kontrakt tëscht dem Staat an RTL stinn. An éischter Instanz hat d'Verwaltungsgeriicht decidéiert, de Vertrag misst net gewise ginn.
De Sven Clement schwätzt an enger éischter Reaktioun vum "beschtméigleche Resultat", wat ee sech hätt kënnen erwaarden. D'Urteel géif d'Kontrollfunktioun vum Parlament vis-à-vis vun der Regierung stäerken an et géif weisen, datt och een eenzelen Deputéierte kéint Kontraker froen an déi dann och vun der Regierung misst gewise kréien.
De Pirat gesäit doran e wichtege Prezedenzfall, deen der Oppositioun am Parlament méi Pouvoir géif ginn, nieft der Méiglechkeet vun enger Enquete-Kommissioun. Eng Confidentialitéitsklausel kéint an Zukunft net méi als Grond ugefouert ginn, fir engem Deputéierten e Kontrakt virzeenthalen.
Text op Verstéiss géint de Kontrakt iwwerpréiwen
Hien dierft an enger éischter Phas net ëffentlech kommentéiere wat am Text genau dra steet, sou de Sven Clement, mee falls sech déi staark Doutten, déi et iwwer den tatsächlechen Ancrage vun RTL zu Lëtzebuerg gëtt, fir hie géife confirméieren, da wier et seng Flicht, fir eng Plainte ze maachen.
Hie géif seng Demande un de Staatsministère elo nach emol reformuléieren a pocht drop, fir de Asiicht an de Contrat d'ancrage ze kréien, sou de Sven Clement.
Reformulatioun vu senger Demande
An dësem konkrete Fall, geet de Sven Clement dovun aus, datt och déi aner Membere vun der Chamber-Mediekomissioun eng Demande wäerte formuléieren fir Asiicht an de ganze Konzessiounsvertrag, inklusiv dem sougenannte Contrat d'ancrage ze kréien.
Méi zum Thema
Accès op den RTL-Konzessiounsvertrag: Piratepartei geet an Appell
D'Piratepartei geet an Appell. Dat nodeems d'Verwaltungsgeriicht sech fir net kompetent erkläert huet bei der Fro, ob de Premier- a Medieminister den Deputéierten de ganze Konzessiounsvertrag vun RTL misst weisen oder net.
Sven Clement mécht Recours géint Regierung
Den Deputéierte Sven Clement mécht e Recours um Verwaltungsgeriicht, fir vum Premier- a Medieminister Kopië vun allen Accorden tëschent dem Staat an dem Grupp RTL ze kréien.
Exklusiv
RTL Group: OGBL a Piratepartei fuerderen Asiicht an den Accord d'Ancrage
Ginn d'Konditiounen déi tëschent dem Staat an RTL Group festgehale sinn agehalen? Déi Fro stellt sech ënnert anerem den OGBL, nodeems den Dënschdeg de Sozialplang fir 69 Mataarbechter tëschent RTL Group ënnerschriwwe gouf.
"Eng verpasste Chance vum Staat"
De Verkaf vu 25,48 Prozent vun den Encevo-Aktien un déi staatlech chinesesch Firma Southern Power Grid wier falsch gewiescht, soe Vertrieder vun déi Lénk an ADR. Och déi gréng weise sech skeptesch.
10 Milliounen Euro d'Joer fir RTL Télé
De Kommunikatiounsministère consideréiert de Programm vun RTL Télé vun 2021 un als service public. Dofir wëll déi blo-rout-gréng Regierung de Staat mat enger direkter Subventionéierung engagéieren.
Wéi eng Zukunft fir RTL Télé Lëtzebuerg?
An Zukunft soll de Staat den Defizit vun RTL Télé iwwerhuelen. Dobäi handelt et sech ëm eng onkloer Zomm a Milliounenhéicht pro Joer. De Konzessiounsvertrag soll an Zukunft och verkierzt ginn.
