Administration pénitentiaire Den Hongerstreik am Prisong ass eriwwer
Den Hongerstreik am Prisong zu Schraasseg ass eriwwer. Dat huet d'Prisongsverwaltung eis de Mëtteg matgedeelt. Dee leschte Prisonéier hätt haut domat opgehalen. Eng 40 Prisonéier waren Enn vun der leschter Woch an den Hongerstreik getrueden. Si haten ënner anerem gefuerdert, wéinst der Coronavirus-Kris fréizäiteg fräi gelooss ze ginn.
Een direkten Zesummenhang tëschent dem Hongerstreik an der Revolt de virleschte Mëttwoch zu Schraasseg géif et net ginn, hat den Direkter vun der Prisongsverwaltung Serge Legil de Moien am 100,7-Interview erkläert. Decidéiert goufe punktuell Verbesserunge fir d'Prisonéier.
Een Infektiounsfall mam Coronavirus géif et zu Schraasseg nach ëmmer net ginn, esou den Direkter vun der Prisongsverwaltung.
Dem Serge Legil no, wier de Prisong de Moment net iwwerbeluecht. 470 Prisonéier sinn do, Plaz wier fir bis zu 600 Prisonéier. Och d'Justizministerin Sam Tanson huet haut an der Chamber gesot, datt et kee Risiko vun enger Surpopulatioun zu Schraasseg géif ginn.
Méi zum Thema
"Mir huelen dat extrem seriö"
Fënnef Deeg no der Rebellioun am Prisong wier d'Situatioun nach ëmmer ugespaant, seet d'Sam Tanson. Et wier wichteg ze assuréieren, datt de Virus net an de Prisong kënnt, ënnersträicht d'Justizministerin.
"Substantielle Schued" am Prisong
Nodeems et de Mëttwoch den Owend am Prisong zu Schraasseg zu enger Rebellioun koum, wieren déi Responsabel elo an Eenzelhaft gesat ginn. Dat schreift de Justizministère an engem Communiqué.
