Verfassungsrevisioun Demande fir Referendum ass beim Staatsministère ukomm
Et ass eng offiziell Demande fir eng Referendums-Prozedur vun engem Comité d'initiative beim Premier Xavier Bettel gemaach ginn. Dat deelt de Staatsministère an engem Communiqué mat.
Bei Verfassungsännerunge kann den zweete Vott an der Chamber duerch e Referendum ersat ginn. Dës Prozedur ass am Artikel 114 vun der Verfassung festgehalen.
Ee Comité d'initiative muss op d'mannst aus fënnef Bierger bestoen, an e muss eng Demande beim Premier maachen, fir e Referendum iwwer eng Verfassungsännerung unzefroen.
De Premier huet dräi Deeg Zäit fir ze decidéieren, ob d'Demande alleguerten d'Krittären erfëllt. Déi Decisioun gëtt da bannent aacht Deeg am offizielle Journal publizéiert.
Sollt d'Demande alleguerten d'Krittären erfëllen, kënnen ageschriwwe Bierger an hire Gemengen dës Demande ënnerschreiwen - spéitstens 15 Deeg no der Publikatioun am offizielle Journal, an dat bis spéitstens zwee Méint nom éischte Vott an der Chamber.
Sechs Deeg an der Woch kann een dës Demande dann op der Gemeng ënnerschreiwen - et ass obligatoresch, datt d'Gemengen et erméiglechen Samschdes dat ze iwwerschreiwen.
Wa 25.000 ageschriwwe Wieler dës Demande ënnerstëtzen, gëtt ee Referendum bannent sechs Méint organiséiert, deen dann den zweete Vott an der Chamber géif ersetzen. Dëse Referendum muss op engem Sonndeg stattfannen.
D'CSV huet d'lescht Woch gemengt, si géif mat hiren 21 Deputéiert e Referendum ufroen wa méi wéi 25.000 Leit déi ëffentlech Petitioun fir e Referendum ënnerschreiwen.
D'lescht Woch war an der Chamber eng éischt Serie vu Verfassungsännerungen an engem éischte Vott guttgeheescht ginn.
Méi zum Thema
Referendum: Wéi zwee CSV-Deputéiert neie Revirement provozéiert hunn
D'CSV huet hir Positioun zum Referendum iwwer d'Verfassungsreform wéinst internen Divergenze erëm revidéiert. Ausléiser dës Kéier waren 100,7-Informatiounen no d'Deputéiert Marc Spautz a Michel Wolter.
Verfassungsreform: Wéi geet et elo weider?
D'Chamber huet der Reform vum Justiz-Kapitel an engem éischte Vott zougestëmmt. Nach ass net kloer, ob den zweete Vott duerch e Referendum ersat gëtt. D'CSV huet hir Positioun dozou revidéiert.
Politolog Philippe Poirier schléisst méiglech Referenden net aus
Et wier méiglech genuch Ënnerschrëften zesummen ze kréien, fir Referenden iwwer déi eenzel Kapitel vun der Verfassungsreform ze erzwéngen. Där Meenung ass de Politolog Philippe Poirier.
Kommentar
Verfassung: "D'Bierger eescht huelen, vun Ufank un"
D'Chamber stëmmt haut iwwer eng éischt Serie vun Ännerungen an der Verfassung of. E Referendum wier keng gutt Iddi, a wier och net koherent, mengt de Jean-Claude Franck an engem Kommentar.
Verfassungsreform: Éischte Vott iwwer d'Justiz-Kapitel
D'Reform vun der Verfassung geet an eng nächst decisiv Phas: d'Chamber hëlt haut een éischte Vott iwwer d'Justiz-Kapitel. Mir hu mam Verfassungsexpert Luc Heuschling iwwer d'Ännerunge geschwat.
Méigleche Referendum bei Verfassungsreform: "Dat Normaalst vun der Welt"
De Mars Di Bartolomeo betount, datt ee Referendum iwwer d'Verfassungsreform respektéiert géif ginn, wa 25.000 ageschriwwe Wieler dat fuerderen. Dat géif den zweete Vott an der Chamber ersetzen.
Verfassungsännerungen: Wéi kann et zu engem Referendum kommen?
Eng ëffentlech Petitioun fir e Verfassungsreferendum wäert an der Chamber debattéiert ginn, d'Parteie wäerte sech nach eemol zur Fro musse positionéieren. Ee Referendum kéint vum Parlament a vu Bierger declenchéiert ginn.
