Wëssenschaft Déi Jonk an den neiaartege Coronavirus

Dat géif notamment eng Analys vun der Europäescher Agence fir d'Preventioun an d'Kontroll vu Krankheeten (ECDC) weisen, bei där 15 Länner, dorënner Lëtzebuerg, betruecht goufen, esou d'Isabel de la Fuente.

An der Majoritéit vun de Länner wier et keng Transmissioun vum Virus an de Schoule ginn. Et wieren och keng Clusteren an de Schoulen entstanen, also Gruppen, an deene sech de Virus an der Schoul verbreet hätt. Eng Ausnam ass Israel, wou no der Ouverture vun de Schoulen eng weider Well entstane wier, obwuel eng Rei Mesuren en place gesat gi waren.

Ënnerscheeder tëschent Jugendlechen a Primärschüler

Eng detailléiert Analys vum Infektiounsverlaf am Educatiounswiesen hei am Land soll dës Woch ofgeschloss ginn. Fir d'Kannerdoktesch aus dem CHL ass awer elo scho kloer, datt sanitär Precautiounen an de Schoulen néideg sinn. D'Gestes barrières, d'Masken an déi generell Hygienesmesurë wieren néideg, an et misst ee sech och de verschiddenen Altersgruppen upassen. De Risiko bei Jugendleche wier net dee selwechte wéi bei Primärschüler.

Rezent wëssenschaftlech Erkenntnesser géifen dat confirméieren, wat een um Ufank vun der Pandemie schonn observéiert hätt. Deemno wiere Kanner ënner zéng Joer däitlech manner ustiechend wéi Jugendlecher - woubäi vill Facteuren eng Roll spillen. Wéi vill Virusmaterial an engem Mënsch ass, d'Immunitéit, mee och d'Unzuel u Kontakter, déi all Persoun huet, géifen eng Roll spillen, esou d'Isabel de la Fuente. Jugendlecher wieren deemno änlech ustiechend wéi Erwuessener.

Meeschtens kee schwéiere Krankheetsverlaf

An et géif sech och confirméieren, datt d'Kanner meeschtens kee schwéiere Krankheetsverlaf hunn, esou d'Isabel de la Fuente. Och wann net genee gewosst ass, firwat. Generell hätte Kanner awer manner Symptomer a géifen de Virus och manner verbreeden.

Am Abrëll a Mee ware guer keng Kanner wéinst dem Coronavirus am CHL hospitaliséiert, seet d'Kannerdoktesch. Am Kontext vun der zweeter Well vun Infektiounen zanter Juni wieren och keng Kanner am Spidol gewiescht, déi schonn an d'Crèche oder an d'Schoul ginn.

Hospitaliséiert goufe just véier Puppelcher, déi sech bei hiren Elteren ugestach haten. Dës wieren iwwerwaacht ginn, well si Féiwer haten. Et hätt kee Kand op der Intensivstatioun misse behandelt ginn, an et hätt een all d'Kanner mat engem gudde Verlaf nees kënnen heem schécken.