Pressekonferenz nom Regierungsrot "De Virus zirkuléiert nees"

D'Zuele sinn déi lescht Woch méi "spronghaft" eropgaangen, esou d'Paulette Lenert. D'Gesondheetsministerin seet, wann dat esou weidergeet, wéisst ee wat dat spéider fir d'Spideeler bedeit. Deen Effekt géif ëmmer mat gewësser Verspéidung antrieden. Et kéint ee "lues a lues vun enger Tendenz schwätzen".

Chris Zeien / Jean-Claude Franck / Serge Kesseler / cbi

(de g. à dr.) Xavier Bettel, Premier ministre, ministre d'État ; Paulette Lenert, ministre de la Santé
Foto: SIP / Jean-Christophe Verhaegen

De Bäitrag vum Serge Kesseler lauschteren


Déi méi positiv Tester wieren net op déi méi héich Unzuel un Tester zeréckzeféieren. Soss hätten d'Neiinfektiounen och schonn éischter missen uklammen. Och de List hätt am Ofwaasser festgestallt, datt de Virus nees méi kurséiert. "Lo muss een oppassen, datt de Virus net ausufert", esou d'Paulette Lenert.

Verschidden Infektiounsclusteren, mee och Eenzelfäll

Op verschiddene Plazen hätte sech méi Leit ugestach: Op enger Party, an zwou Firmen (eng Kéier fënnef, eng Kéier zéng Fäll), esou d'Paulette Lenert. Fir de Rescht géifen et isoléiert Fäll ginn: Zum Beispill op verschiddene Vollen aus dem Ausland op Lëtzebuerg.

Et hätte sech Enn Juni awer och 24 Leit op enger Party infizéiert. Och a Schoule hätt et Eenzelfäll ginn, et gëtt och e Fall, wou sech véier Schüler an enger Klass infizéiert hunn.

Et wier net einfach all d'Kontakter vun deene Leit ze retracéieren, esou d'Gesondheetsministerin. Trotzdeem gesi weder de Premierminister nach d'Gesondheetsministerin momentan de Besoin fir eng Tracking-App anzeféieren.

Den Dënschdeg goufe 5.960 Tester gemaach, 46 Tester si positiv ausgefall, et ginn zwou nei Hospitalisatiounen, et leie nach ëmmer zwou Persounen op der Intensivstatioun. Et bleift weider bei 110 Doudesaffer, esou de Premier.

Nei Gesetzestexter mat Restriktiounen an der Preparatioun

Et wéilt een der Populatioun viru vertrauen an op Eegeninitiativ setzen, esou de Premier Xavier Bettel, mee et géif een och eng Augmentatioun vun den Zuele feststellen. Gréisstendeels wier déi Augmentatioun dorop zeréckzeféieren, datt am private Beräich a vereenzelt am Nuetsliewen d'Reegelen net respektéiert goufen. D'Police hätt an zéng Fäll Protokoller geschriwwen.

Dofir misst een elo antizipéieren an dofir suergen, datt een d'Efforte vun de leschte Méint net fir näischt gemaach hätt, esou de Xavier Bettel. D'Regierung géif dofir am Moment en neien Text ausschaffen, deen och nees Obligatiounen an net just Recommandatioune virgesäit.

Am private Beräich sollen an Zukunft Reegele gëllen, esou de Regierungschef. Grouss Fester wiere méiglech, mee et dierfte just Dëscher vu maximal zéng Leit ginn an et misst een eng Mask undoen, wann ee sech beweegt oder wann d'Distanz tëschent de Leit net grouss genuch wier.

Déi nei Gesetzestexter sollen esou séier wéi méiglech an der Chamber deposéiert ginn, esou de Premierminister. De Xavier Bettel hofft, datt de Staatsrot d'Texter net iwwer formell Oppositioune wäert blockéieren.

"Loosst Iech testen"

De Regierungsrot huet eng Verlängerung vum Large Scale Testing decidéiert, esou d'Gesondheetsministerin. An där éischter Phas wiere 15 Prozent vun der Populatioun getest ginn. An där zweeter Phas géif d'Testcapacitéit "oprecht erhale bleiwen", mee et géif méi geziilt getest ginn.

Vun den 191.000 Tester déi bis haut gemaach goufen, wieren 115.000 Tester am Kader vum Programm vum Large Scale Testing gewiescht. 24 Prozent vun de Leit, déi invitéiert waren, hätte matgemaach.

D'Tester am grousse Stil sollen iwwer Enn Juli eraus virugeféiert ginn. D'Ausschreiwung wier an der Preparatioun. Et soll méi gezielt getest ginn an d'Tester kéinte bis de Februar 2021 virugoen. Wéi d'Capacitéite sech wäerten entwéckelen, konnt d'Gesondheetsministerin net soen.

Méi zum Thema

Xavier bettel
Politik

Anescht wéi virgesi wäert de Premier Xavier Bettel een Dënschdeg an der Chamber keng Ried zur Lag vun der Natioun halen. Amplaz soll et an der Chamber eng weider Deklaratioun vum Regierungschef am Kontext vun der Corona-Pandemie ginn.

Net verpassen

  • 17.10. De Gudden Toun

    De Gudden Toun.jpg

    Wann d'Deeg méi kal, gro a kuerz ginn, stécht deen een oder anere vläicht de Kapp nees méi an déi sozial Medien. An der Oktober Editioun schwätzen de Roland Meyer, Ian De Toffoli, Raoul Biltgen, Jeff Schinker an d'Anne Klein.

Programm

  • Notturno

  • On air

    Virum Dag vu 6 bis 10

  • Panorama

  • Virum Dag vu 6 bis 10

  • Noriichten

Dossieren

  • CinÉast 2021

    Et ass déi véierzéngt Editioun vum CinÉast Filmfestival. Vum 7. bis de 24. Oktober ginn Featuren a Kuerzfilmer aus Länner aus Mëttel- an Osteuropa gewisen. Siwe Filmer sinn an der Kompetitioun.

  • Bundestagswal 2021

    Däitschland wielt de Samschdeg, 26. September en neie Bundestag. Wat sinn d'Enjeuen, wie gëtt Kanzler oder Kanzlerin, wéi verleeft d'Wahlkampagne. An eisem Dossier zum Theema Bundestagswal gidd Dir alles gewuer.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen