Chronik De Markus Söder spillt op Risiko

De bayresche Ministerpresident Markus Söder ass ouni Zweiwel ee vun de politesche Gewënner vun der Corona-Kris an Däitschland. Och, well hien dacks als éischten a konsequent gehandelt huet. Elo wëllt de Markus Söder a Bayern all Mënsch op Corona testen - fir näischt. Hien trëfft domat op Widderstand.

Matthias Kirsch (Berlin) / cbi

Kommentar Matthias Kirsch
De Matthias Kirsch ass Korrespondent zu Berlin a schafft fir de SPIEGEL. Foto: Archiv

Vun dësem Mount u wëllt déi bayresch Regierung hir ganz Bevëlkerung teste loossen - 13 Millioune Leit. An dat nom Motto: "Séier, fir näischt, fir jiddwereen." E Massentest also, komplett bezuelt vun der Regierung, fir de stolze Präis vun 200 Milliounen Euro.

Succès bei de Wieler

De Markus Söder ass domat deen éischten däitsche Politiker, deen d'Fuerderung no Massentester konkret ëmsetzt. Déi Positioun ass fir hien, besonnesch an der Corona-Kris, net nei. Bayern huet am Mäerz als éischt Bundesland dicht gemaach, a viregt Woch huet Bayern als éischt déi nei Reesbeschränkunge fir Touristen aus Hotspot-Regiounen ageféiert.

Mat sengem séieren Handelen huet de Söder Succès gehat - net just géint de Virus, virun allem a sengem eegenen Interêt. Seng Sondagewäerter sinn astronomesch, genee wéi déi vun der CSU a Bayern an déi vun der Unioun op nationalem Niveau.

Eng falsch Sécherheet

An trotzdeem: mat sengem Virpersche bei de Massentester dierft de Söder sech verzockt hunn. Well de Widderstand ass grouss - souwuel aus der Politik wéi och aus der Wëssenschaft.

Den Haaptproblem sinn déi sougenannte PCR-Tests, déi benotzt ginn an ebe just eng Momentopnam sinn. Wien negativ getest gëtt, ka sech eben e puer Minutte méi spéit enzwousch anescht ustiechen. An trotzdeem féiert e negatiivt Resultat eben dozou, datt Leit sech a Sécherheet spieren - a vläicht méi riskéieren, wéi si et ouni Test gemaach hätten.

Géint d'Strategie vun der Bundesregierung

Virun allem setzt de Markus Söder heimat op eng Strategie, déi där vun der Bundesregierung entgéint geet. Där hiert Testkonzept cibléiert eng héich Qualitéit vun den Tester, an net eng héich Quantitéit. Dat heescht: et soll zwar vill getest ginn, mee virun allem sollen déi richteg Leit getest ginn.

Deementspriechend decidéiert huet sech och de Gesondheetsminister Jens Spahn géint dem Söder seng Propos gestallt.

Politesche Gewënner

De Markus Söder ass bis elo ee vun de grousse politesche Gewënner aus der Kris hei an Däitschland - säi Corona-Management kéint hien d'nächst Joer mat enger Kanzlerkandidatur kréinen, ganz ausgeschloss ass dat net.

Mee seng Test-Offensiv setzt aner Ministerpresidenten ënner Drock a stellt d'Bundesland Bayern nees an eng Sonderroll - eppes, wat historesch fir schlecht Stëmmung am Rescht vun der Republik suergt. A wann duerch d'Massentester a Bayern op eemol Tester feele fir déi Leit, déi se wierklech brauchen - da kéint dës Avance ganz schéin no hanne lassgoen.

An der Mediathéik:

Chronik / / Matthias Kirsch
Lauschteren

Méi zum Thema

Carolin Dylla
Corona-Kris

Am Saarland ginn et zanter e Méindeg eng Rei Lockerunge vun de Corona-Reegelen: et goufen net vill nei confirméiert Neiinfektiounen. Ee Gespréich mat der Carolin Dylla, Politik-Reporterin beim SR.

COVID-19 Test
Corona-Pandemie

44 Leit goufen hei am Land bannent engem Dag positiv op de Coronavirus getest. Dat ass déi stäerksten deeglech Hausse zanter dem 21. Abrëll. Bannent de leschte 24 Stonnen goufen iwwer 4.217 Tester gemaach.

Ulf Nehrbass
Corona-Pandemie

Et wier méiglech, datt Lëtzebuerg um Ufank vun enger zweeter Well steet, seet den Ulf Nehrbass. Dofir wier et wichteg, datt d'Massentester gemaach ginn, fir esou d'Infektiounsketten ze ënnerbriechen.

COVID-19 Test
Coronavirus

Bei der Campagne vun Tester am grousse Stil (Large-Scale-Testing) wiere bis elo 12 Leit positiv op den neie Coronavirus getest ginn. Dës Zuel gouf den Donneschdeg de Moien op enger Pressekonferenz vu Research Luxembourg genannt.

Programm

Net verpassen

  • AutorInne-Lies

    Autorinnelies final

    Autorinnen an Auteuren doheem akustesch agefaangen. 

Dossieren

  • #beethoven20

    De Jean Muller gëtt an 32 Episoden en déiwen Abléck an de Kosmos vum Ludwig van Beethoven senge Pianossonaten.

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen