International Politik De Jean Asselborn an Afghanistan
De Jean Asselborn war fir eng Aarbechtsvisite vun engem Dag an Afghanistan. De Lëtzebuerger Diplomatiechef hat zu Kabul Gespréicher mam afghanesche President Aschraf Ghani, mam Ausseminister a mam NATO-Vertrieder. Zentral Sujete waren d'Friddensgespréicher, déi d'USA zanter dem leschte Summer mat den Taliban féieren an déi fir de Juli annoncéiert Presidentschaftswahlen an Afghanistan.
"Afghanistan ass an der vläicht wichtegster Phas zanter 2001", esou eng Conclusioun vum Jean Asselborn no senge politesche Gespréicher zu Kabul. Dowéinst misst e vläicht och e wéineg onkonventionell virgoen, erkläert de Minister.
Datt d'USA zanter dem leschte Summer am Golfemirat Katar Gespréicher mat den Taliban féieren, misst net onbedéngt eppes Negatives sinn. Et wier allerdéngs "e bëssen tricky", datt d'Taliban mat den Amerikaner verhandelen, an net mat der afghanescher Regierung oder mam President.
Kee Schratt hannerzeg
D'Gespréicher USA-Taliban missten zu engem inner-afghaneschen Dialog féieren, an déi afghanesch Verfassung misst respektéiert ginn, hofft de Jean Asselborn.
Donieft missten d'Errongenschafte respektéiert ginn. Den Ausseminister nennt hei d'Beispiller vun der Scolarisatioun vun de Meedercher, d'Rechter vun de Fraen an d'Rechter vun de Minoritéiten.
D'Lëtzebuerger Arméi am Afghanistan
De Jean Asselborn hat och nach Gespréicher mat den zwee Membere vun der Lëtzebuerger Arméi, déi am Kader vun der NATO-Ausbildungsmissioun am Camp Marmal bei Masar-e Scharif am Norde vun Afghanistan stationéiert sinn.
An dësem Militärlager ënner däitschem Kommando sinn eng 2.000 Zaldoten aus 23 Länner.
Zanter 2013 hunn iwwer 500 Afghanen eng Demande de protection internationale zu Lëtzebuerg gemaach. De Grand-Duché schéckt wéinst der Sécherheetssituatioun de Moment keng Demandeuren zeréck an Afghanistan.
No senger Visite an Afghanistan ass de Jean Asselborn virun an d'Nopeschland Usbekistan geflunn. Duerno soll hie weider an de Pakistan fléien.
Detailer mam Serge Kesseler:
Andréck vun der Auslandsrees vum Jean Asselborn:
Méi zum Thema
Lëtzebuerger Arméi bleift an Afghanistan engagéiert
D'Bedeelegung un der NATO-Missioun fir d'Formatioun an d'Ënnerstëtzung vun den afghanesche Sécherheetsforcë soll bis 2020 verlängert ginn. Lëtzebuerg schéckt och en zweete Mann an Afghanistan.
Jean Asselborn am Kosovo
En Accord fir Visa-Fräiheet vu Kosovare stoung bei der Visite vum lëtzebuergeschen Ausseminister zu Pristina am Mëttelpunkt. Den Ament kënne Leit aus dem Kosovo net ouni e Visa an d'EU reesen.
