Event-Secteur "Dat ka keen eleng packen"

Zanter méi wéi siwe Méint géint am Eventberäich bal net méi geschafft, an d'Perspektive fir déi nächst Zäit si schlecht. D'LEA, Intressevertrieder vun enge 75 Betriber hofft elo op weider staatlech Hëllefen. De Secteur ass solidaresch, esou de Charel Schroeder, mee et erwaart ee sech am Géigenzuch och Solidaritéit.

Christiane Kleer

Charel Schroeder
De Charel Schroeder, President vun der LEA, fuerdert méi Hëllefen

De ganzen Interview lauschteren


Hochzäite ginn ofgesot, Concerte falen aus a grouss Chrëschtdagsfeieren dierft et dëst Joer keng ginn: D'Betriber aus dem Beräich vum Evenementiel gehéieren zu deenen, déi d'Kris am Stäerksten ze spiere kréien. Dobäi wier de Secteur virun der Pandemie immens stabel gewiescht: "Et waren alles gesond Betriber, déi kee strukturelle Problem haten", seet de Charel Schroeder, President vun der Luxembourg Event Association (LEA).

"Soss gëtt et een düstert Liewen"

D'Solidaritéit wier grouss am Secteur, seet hien, et wier evident, datt d'Spideeler misste kënne fonctionéieren. Mee de Charel Schroeder mécht och kloer, datt ee sech eng Géigeleeschtung erwaart: "Dofir muss d'Gesellschaft sech awer och solidaresch mam Secteur weisen, well ech sinn iwwerzeegt; eis Betriber ginn erëm gebraucht, wann de Marché zeréckkënnt, soss gëtt et och een düstert Liewe fir eis Gesellschaft".

Weider Hëllefe gi gebraucht

D'LEA hofft elo op weider staatlech Ënnerstëtzung. Datt d'Mesure vum Chômage partiel et erlaabt, d'Salariéë weider an de Betriber ze halen, wier eng gutt Saach, mee de Secteur bréicht weider och d'Méiglechkeet, fir déi fix Käschten ze decken. "Do geet et ëm Loyeren, déi musse bezuelt ginn, do geet et ëm Leasingen an Assurancen, grad wéi Amortissementer", erkläert de Charel Schroeder. Et wiere Fraisen, déi ufalen, och wann net geschafft gëtt, an déi de Betriber "den Hals ëmmer méi zouzéien". Op laang Dauer géif "keen Entrepreneur dat eleng packen".

"De Krees huet sech nach zougezunn"

D'Mesuren, déi e Freideg vun der Regierung decidéiert goufen, wieren eng zousätzlech Belaaschtung, esou de Charel Schroeder am 100,7-Interview. Mam Couvre-feu vun 23 Auer owes u wier et schwéier "nach eppes Propperes" ze organiséieren. "De Krees vun deem, wat méiglech ass, huet sech elo nach eemol zougezunn", fënnt de President vun der LEA.

Hoffen op d'Impfung a Schnelltester

D'LEA geet dovun aus, datt de Secteur vum Evenementiel nach ee gutt halleft Joer wäert am aktuelle Modus weiderfueren, an also eréischt am nächste Summer erëm vill méi Aktivitéit wäert opkommen. De Secteur hofft, datt bis dohin en Impfstoff wäert disponibel sinn. En attendant, wieren och Schnelltester op de Covid-19 eng Méiglechkeet fir erëm méi grouss Evenementer ze organiséieren.

D'LEA huet eng 75 Memberen, dorënner Traiteuren, Experte fir Toun a Luucht a Betriber, déi grouss Fester organiséieren.

Méi zum Thema

Klaus Vögele
Etüd iwwer de psycheschen Impakt vum Confinement

Eng Etüd déi a sechs Länner gemaach ginn ass, wollt erausfannen, wéi eng Auswierkungen d'Confinementsmesuren op d'Psych vun de Mënschen hat. Spuenien, Italien, Frankräich, Schweden, Lëtzebuerg an Däitschland hu matgemaach.

Michel Welter
Concertsberäich

De Michel Welter weess net, wéi laang den Atelier et nach als Organisateur vu Concerte kéint packen. De Gerant vun "A promotions" rechent domat, datt eréischt 2022 eng normal Aktivitéit kéint erreecht ginn.

Net verpassen

  • 17.10. De Gudden Toun

    De Gudden Toun.jpg

    Wann d'Deeg méi kal, gro a kuerz ginn, stécht deen een oder anere vläicht de Kapp nees méi an déi sozial Medien. An der Oktober Editioun schwätzen de Roland Meyer, Ian De Toffoli, Raoul Biltgen, Jeff Schinker an d'Anne Klein.

Programm

Dossieren

  • Bundestagswal 2021

    Däitschland wielt de Samschdeg, 26. September en neie Bundestag. Wat sinn d'Enjeuen, wie gëtt Kanzler oder Kanzlerin, wéi verleeft d'Wahlkampagne. An eisem Dossier zum Theema Bundestagswal gidd Dir alles gewuer.

  • Olympesch Spiller 2021

    D'Olympesch Spiller fannen, mat engem Joer Verspéidung, tëscht dem 23. Juni bis den 8. August zu Tokyo statt. Fir eis op der Plaz ass eise Korrespondent Philip Crowther.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen