Corona-Kris "Dat gehéiert an d'Ëffentlechkeet"
Sollt et esou sinn, datt et effektiv eng Party war, déi fir déi nom Weekend méi héich Zuel vun neien Infektioune mam Coronavirus gesuergt huet, da wier dat eng Informatioun, déi an d'Ëffentlechkeet gehéiert, fënnt de Professer Claude P. Muller, Virolog am Luxembourg Institute of Health (LIH).
Et wier wichteg drop opmierksam ze maachen, datt esou Partyen net solle stattfannen, mee et wier och wichteg ze wëssen, datt et op esou enger Party lassgaangen ass, an datt een déi Leit, déi op dëser Party waren, retracéiert fir déi néideg Mesuren ze ergräifen.
Ass eng zweet Well inevitabel?
Et wier wichteg, datt d'Leit esou Saache gewuer gi fir ze verstoen, datt d'Opriff, déi gemaach gi fir weider virsiichteg ze bleiwen, net muttwëlleg sinn, esou de Professer Muller. De Professer Muller mengt nämlech net, datt eng zweet inevitabel wier.
"Ech géif soen, wa mer eis gutt schécken, dann ass et guer net néideg, datt eng zweet Well kënnt. An dann ass jo och d'Fro: 20 Fäll oder 15 Fäll, ass dat elo schonn eng Well? Oder ass dat elo einfach déi Variabilitéit, déi mer wäerten hunn, méiglecherweis bis zum Vaccin."
En Impfstoff vläicht bis Enn des Joers
Wat d'Entwécklung vun esou engem Impfstoff ubelaangt géife gutt Fortschrëtter gemaach ginn. Zwee Vaccine wäre scho relativ wäit an de klineschen Tester, an der Phas dräi. Wann déi gutt géife lafen, da misst den Impfstoff nach produzéiert ginn.
"Ech kéint mir virstellen, datt bis Enn des Jores en Impfstoff do ass, op d'mannst fir Risikopatienten oder Risikogruppen, oder zum Beispill och d'Gesondheetspersonal."
Nach net vill Leit hunn Antikierper
De Virolog Claude P. Muller ass der Meenung, datt et d'Zil vun der Strategie vun de villen Tester ass, d'Zäit ze iwwerbrécke bis e Vaccin do ass. Nëmme ganz wéineg Leit hei am Land hätten Antikierper - däitlech manner wéi fënnef Prozent.
Dohier kéint een d'Infektiounskurv och just niddereg hale wann et geléngt, all Infektiounskette méiglechst séier ze ënnerbriechen.
An der Mediathéik:
LauschterenMéi zum Thema
Large-Scale-Testing: Bis elo 12 positiv Tester
Bei der Campagne vun Tester am grousse Stil (Large-Scale-Testing) wiere bis elo 12 Leit positiv op den neie Coronavirus getest ginn. Dës Zuel gouf den Donneschdeg de Moien op enger Pressekonferenz vu Research Luxembourg genannt.
Wéineg fräiwëlleg Corona-Tester um Flughafen
No der Landung um Findel kann all Passagéier sech fräiwëlleg op de Coronavirus teste loossen. Ronn zéng Prozent vun de Passagéier profitéiere vun där Méiglechkeet.
Paulette Lenert: "Lëtzebuerg ka séier eng Tracing-App entwéckelen"
Och zu Lëtzebuerg lafe Virbereedunge fir eng Tracking-App ze entwéckelen, déi d'Leit warnt, wa sI mat engem Coronavirus-Infizéierten a Kontakt waren, Esou d'Gesondheetsministerin Paulette Lenert. D'Entwécklung vun esou enger App wier am "Standby".
Test-Statioune sinn operationell
Déi 17 Test-Statiounen, fir d'Populatioun op Covid-19 ze testen, sinn elo all voll funktionell. An den nächste Woche soll mat ronn enger Milliounen Tester déi ganz Populatioun kënne getest ginn.
