Auslandschronik Däitschland: Keng Angscht virun Instabilitéit

Et geet e Gespenst ëm dëser Deeg an Däitschland, an dat nennt sech politesch Instabilitéit. Zënter datt d'Verhandlunge fir eng sougenannte Jamaika-Koalitioun virun enger Woch geplatzt sinn, sinn iwwerall Warnungen ze héieren: Däitsch Zeitungskolumnisten zéie Parallellen mat der Weimarer Republik, wou et bannent 13 Joer 20 verschidde Regierungen gouf. Déi international Press schreift vu schwéieren Zäite fir Europa, an de Bundespresident schwätzt de Parteien an d'Gewëssen an appelléiert un hir Verantwortung.

Dës allgemeng Panikmaacherei weist och scho Wierkung. Während Neiwahlen virun enger Woch nach wahrscheinlech geschéngt hunn, gesäit et mëttlerweil esou aus, wéi wann d'SPD sech awer nach géing iwwerriede loossen, nees an eng grouss Koalitioun mat der Unioun ze goen - verantwortungsbewosst Vollekspartei oblige.

Bal 14 Prozentpunkte verluer

Mä wat elo esou wierkt, wéi wann d'Sozialdemokraten hir Verantwortung als staatsdroend Partei flichtgeméiss wéilten erfëllen - kann op laang Siicht genee de Contraire bewierken. Wann et tatsächlech op en Neits zu enger grousser Koalitioun géif kommen, géifen zwar zwou Parteien regéieren, déi zesummen eng Majoritéit hunn, mä et wären ausgerechent déi zwou Parteien, déi bei de Wahlen am September déi meeschte Stëmme verluer hunn. D'Unioun an d'SPD hunn zesummen ëmmerhi bal 14 Prozentpunkte verluer.

Politesche Profil schäerfen

An dës Entwécklung riskéiert sech fortzesetzen, wann déi zwou gréisst Parteien elo trotzdem zesumme weiderregéieren. Eng grouss Koalitioun zwéngt si nämlech dozou, Kompromësser ze maachen, an hir Positiounen openeen ofzestëmmen. Säin eegenen politesche Profil ze schäerfen, ass an esou enger Konstellatioun nëmme schwéier méiglech.

Neiwahlen, oder eng vun der SPD toleréiert Minoritéitsregierung, wäre kuerzfristeg sécher méi ongewinnt an och e bësse méi riskant, wéi eng nei grouss Koalitioun. Dës Zeenarie géifen de grousse Parteien et awer och erlaben, nees eng méi kloer politesch Sprooch ze fannen, déi si vunenaner ënnerscheet. An dem Wieler domat de Choix tëscht méi kloer definéierte politeschen Alternative gëtt.

Keng Angscht hunn

Grad Däitschland, e Land dat ekonomesch esou gutt do steet, wéi kaum en anert Land an der EU, bräicht keng Angscht virun Neiwahlen oder enger Minoritéitsregierung ze hunn. No den nächste Bundestagswahle wär et dann och vläicht nees méi einfach, eng Regierungskoalitioun ze fannen.