Joresréckbléck D'Wiederkapriolen 2018

Tëschent Juni an August hu verschidde Wiederkonditioune fir Chaos a Schied zu Lëtzebuerg gesuergt. Nieft den Iwwerschwemmungen am Mëllerdall a weideren Deeler vum Land, hunn och déi héich Temperature fir aussergewéinlech Wiederkonditioune gesuergt.

Maurice Anthony / cbi

Iwwerschwemmung 3
De staarke Reen hat 2018 fir schwéier Iwwerschwemmunge gesuergt. Foto: Archiv.

D'Iwwerschwemmunge waren éischt Signaler, déi op e Summer mat extreme Wiederkonditiounen hiweise sollten. Den 1. Juni koum et zu staarkem Nidderschlag am Grand-Duché, woubäi virun allem am Oste vum Land, virop am Mëllerdall, Iwwerschwemmunge fir vill Schued gesuergt hunn.

Eng betraffe Persoun huet deemools erzielt, datt si vun hallwer dräi u waakreg a virun der Dier gewiescht wier. "Dunn hu mir aus der Fënster gekuckt, an dunn ass den Auto schonn an der Strooss geschwommen. Wéi mir dann erofkoumen, do stoung d'Waasser schonn ee Meter am Haus, an dobanne war alles futti."

Séier Hëllef duerch d'Cellule de crise

Den Dan Kersch, deemolegen Inneminister, war op der Plaz, fir sech e Bild ze maachen an huet dobäi en éischte Constat gemaach. Et hätt een eng Cellule de crise gemaach, déi ee fir esou Fäll virgesinn hätt. Doduerch hätt een och kënnen esou séier Hëllef lassschécken.

"De Mëtteg wäerten och nach Truppe vun der Arméi komme fir ze hëllefen opzeraumen an da sinn natierlech och nach déi laangfristeg Schied ze erwaarden, un de verschiddene Stroossen, déi méi laang wäerten zou bleiwen." Wichteg wier et, fir d'Waasserversuergung esou séier wéi méiglech erëm ze garantéieren.

Zéng Deeg méi spéit sollte weider Schaueren iwwer d'Land kommen an am Süde vum Land - virop op den Autobunnen - fir Chaos suergen, sou datt d'Rettungsdéngschter dacks hu missten intervenéieren. 200 Pompjeeë waren deemools am Asaz gewiescht, a 15 Gemenge ware betraff.

Klimawandel ass och zu Lëtzebuerg ukomm

Fir d'Christine Bastian vum Waasserwirtschaftsamt hunn déi Wiederkapriolen eng kloer Ursaach. Et misst een net vum Fach si fir ze mierken, datt een ëmmer méi dacks staarke Reen hätt. Ugefaangen hätt dat am Mee a Juli 2016, net nëmmen zu Lëtzebuerg, mee och an den Nopeschlänner.

"Also ech menge mir sinn am Klimawandel definitiv ukomm", esou d'Christine Bastian. D'Waasserwirtschaftsamt hätt 2014 Etüde gemaach, an déi hu "relativ kloer gesot, datt mir méi dacks esou extrem Reenevenementer am Summer wäerte kréien."

Den zweetwäermste Summer zanter 1947

Nieft dem Reen huet sech de Klimawandel awer och a Form vun der staarker Hëtzt de Summer iwwer bemierkbar gemaach. Meteo-Lux huet an deem Kontext den zweetwäermste Summer zanter 1947 registréiert, dat mat enger Duerchschnëttstemperatur vun 20,1°Celsius. Wiederkonditiounen, déi sech och op de mënschleche Kierper reperkutéieren.

De Pierre Weicherding, Chef de Division um Gesondheetsministère stellt fest, datt an de lescht Joren d'Duerchschnëttstemperatur ni esou héich war, wéi 2018. "Mee all kéiers wann d'Duerchschnëttstemperatur iwwer 23°C gaange sinn, dann hate mir och Entréeën an de Spideeler an deem Beräich." D'Wieder 2018 wier also vergläichbar mat de Jore virdrun, mee dëst Joer hätt et just méi laang gedauert.

Och Bauere ware betraff

D'Hëtzt huet awer och en Impakt op d'Aarbecht vun de Bauere gehat. Grond heifir wier ënner anerem de Präis vum Waasser gewiescht, wéi de Geméisbauer Nikki Kirsch Ufank August am 100,7-Interview erzielt huet: Vill Geméis, wéi Zalot, kéint een nëmme mat Sprengeren nätzen, an dofir bräicht ee ganz vill Waasser, well duerch d'Hëtzt géif scho ganz vill verdonsten. Weider wier d'Waasser generell fir de Geméis- an Uestbau einfach ze deier, seet den Nikki Kirsch.

Fir op d'Dréchent an domat op d'Ertragsausfäll vun de Baueren ze reagéieren, hat déi europäesch Kommissioun am August ugekënnegt, d'Ausbezuelen vu Subsiden un déi concernéiert Baueren, dorënner och Baueren zu Lëtzebuerg, virzezéien.

An der Mediathéik:

Dossier vum Dag / / Maurice Antony
Lauschteren

Méi zum Thema

Garage Sanchis Grondhaff
Sechs Méint no den Iwwerschwëmmungen

Zanter de staarken Iwwerschwemmungen am Juni dëst Joer huet de Wirtschaftsministère 20 Betriber indemniséiert, déi am Ganzen 1,4 Milliounen Euro ausbezuelt kruten. Ee vun dëse Betriber gehéiert dem Garagist José Sanchis.

Hëtzt Termometer
Bilan vun der Hëtzwell

Duerch d'Hëtzt sinn d'Hospitalisatiounen an d'Visitten an den Urgencen eropgaangen. Dat seet de Chef vun der Inspection Sanitaire Pierre Weicherding. D'Spideeler mellen dem Gesondheetsministère, wa Leit wéinst Symptomer, déi mat der Hëtzt ze dinn hunn, behandelt ginn.

Jean-Paul Lickes
Zoustand vun de Gewässer

D'Temperature sinn ongewéinlech héich, et gouf scho laang kee Reen méi: "Fauna a Flora an an ronderëm eis Gewässer si gestresst", seet de Jean-Paul Lickes vum Waasserwirtschaftsamt.

Mëllerdall Schued u Wanderweeër
De Stroossenzoustand no den Iwwerschwemmungen

D'Iwwerschwemmungen aus de leschte Wochen an Deeg hunn vill Schied u verschiddene Stroossen gemaach. Ponts et Chaussées hunn d'Analys vun der Situatioun gemaach a reparéieren. E Bilan!

Iwwerschwemmungen
Héichwaasser 1. Juni 2018

Wéinst dem ville Reen an der Nuecht vun Donneschdeg op e Freideg, virun allem am Mëllerdall, ass d'Krisen-Zell vum Haut Commissariat à la protection nationale aktivéiert ginn. Een Iwwerbléck, Hannergrondinformatiounen a Reaktiounen.

Musel.jpg
Héichwaasserrisikomanagementplang

Déi aktuell Héichwaasser-Situatioun kéint statistesch gesinn all zwee Joer esou virkommen, seet d'Christine Bastian vum Waasserwirtschaftsamt. D'Situatioun wier deemno "guer näischt Aussergewéinleches".

Net verpassen

Programm

  • Concert - Léiffrawëschdag

  • On air

    Spektrum - The Wombats - Oumou Sangaré

  • Noriichten

  • Spektrum - Caminero Quintet

  • Noriichten

Dossieren

  • Saint-Malo: "Étonnnants Voyageurs"

    Saint-Malo ass déi Plaz, wou déi sougenannt ''littérature-monde'' gefeiert gëtt. Den 100,7 war bei der leschter Editioun vum Festival Étonnants Voyageurs am Juni dobäi.

  • Dossier: Cannabis-Legalisatioun

    Nach am Laf vun dësem Joer soll e legale Kader ausgeschafft ginn, fir e staatlech kontrolléierten Ubau vu Cannabis fir medezinesch Zwecker zu Lëtzebuerg méiglech ze maachen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen