Offallgestioun D'Superdreckskëscht kritt e Finanzéierungsgesetz
D'SuperDrecksKescht kritt e speziellt Finanzéierungsgesetz. D'Ëmweltministesch Carole Dieschbourg huet gëschter ugekënnegt, si wéilt nodréiglech eng legal Basis fir de staatleche Finanzement vun der privater Offallfirma schafen. Si reagéiert domat op en Avis vum wëssenschaftlechen Déngscht vun der Chamber. Dee war viru Kuerzem zur Conclusioun komm, d'Finanzéierung vun der SuperDrecksKëscht wier am Moment net verfassungskonform.
An dofir soll elo séier gehandelt ginn, esou d'Emweltministesch Carole Dieschbourg geschter no enger Réunioun mat den zoustännege Chamberkommissiounen. Si hätt schonn de leschte Freideg en Avant-Projet fir sou ee Gesetz deposéiert, dat d'Regierung och ugeholl huet.
Dee Gesetzesprojet gesäit fir, datt de Kontrakt, den d'Regierung scho viru véier Joer mat der Bedreiwerfirma vun der SuperDrecksKescht ënnerschriwwen hat nodréiglech regulariséiert gëtt. An zwar dee ganze Kontrakt, den nach bis 2028 leeft. D'Oppositioun ass domatt awer net averstanen, sou de Piraten-Deputéierte Sven Clement. D'Regierung wéilt den Deckel op dat Theema drop maachen, ouni nei Froen, déi opgeworf gi sinn, ze beäntwerten.
D'Pirate fuederen datt d'Organisatioun an de Finanzement vun der SuperDrécksKëscht méi grondleeënd iwwerduecht gëtt. Et wier nämlech net kloer, wéi déi privat Offallfirma genee mat den ëffentleche Suen emgeet, déi se fir hir Servicer kritt, esou de Sven Clement. Och d'CSV ass dogéint, datt den aktuelle Kontrakt mat der SuperDrécksKëscht bis 2028 viruleeft. D'Députéiert Diane Adehm fuedert datt nei verhandelt gëtt an datt eng nei Ausschreiwung gemaach gëtt. "An datt déi Ausschreiwung dann esou gemaach gëtt, datt d'Kandidaten sech net nëmme wärend engem Mount kenne melle, mee mei laang."
D'Emweltministesch Carole Dieschbourg ass awer aus zwee Grenn net bereet op déi Fuederungen anzegoen: Eischtens, bräicht een e puer Joer Zäit, wann een d'Offallgestioun komplett wéilt reforméieren. An zweetens, hätt de Staat sech schon engagéiert. Et kéint also rechtlech ugefecht ginn, wann de Staat seng Responsabilitéit géigeniwwer vun engem Contractant net géif iwwerhuelen.
E neie Kontrakt wellt d'Emweltministesch virun 2028 dofier net agoen.
Méi zum Thema
CSV: Situatioun vun der Superdreckskëscht muss regulariséiert ginn
Am Dossier Superdreckskëscht besteet d'CSV drop, datt d'Situatioun vun der Superdreckskëscht regulariséiert gëtt. Fir si steet ausser Fro, datt d'Chamberverwaltung mat engem rezenten Avis richteg läit, sou de Gilles Roth.
Finanzement vu Superdreckskëscht wërft Froen op
De Finanzement vun der Superdreckskëscht ass net esou gereegelt, wéi et d'Verfassung virgesäit, esou déi wëssenschaftlech Cellule vun der Chamber. Eng iwwerraschend Feststellung mat Konsequenzen, déi wäit ginn.
CSV: Audit iwwer d'Superdreckskëscht geet net wäit genuch
Den Audit iwwer d'Superdreckskëscht geet der CSV net wäit genuch. Et missten an engem zweete Schrëtt och Aspekter wéi eventuell Interessekonflikter analyséiert ginn, esou den CSV-Deputéierte Paul Galles.
Audit proposéiert Adaptatiounen
Et kéint ee punktuell Adaptatioune maachen, mee u sech wier alles an der Rei, dat ass kuerz resuméiert d'Conclusioun vum Audit iwwer d'Superdreckskëscht. Et hätt ee keng Irregularitéite kënne feststellen.
CSV: Superdreckskëscht soll net méi privat gefouert ginn
D'CSV plädéiert dofir, d'Aktioun Superdreckskëscht vun engem Etablissement public iwwerhuelen ze loossen, seet de Paul Galles. Dëst nodeems een Artikel vu reporter.lu eng Rei Froe ronderëm d'Firmekonstrukt opgeworf hat.
